MUHCS ah inziaklut an pung zel
Mizoram sorkar chuan tun sorkar kum kal mek 2026-27 atana Mizoram Universal Healthcare Scheme (MUHCS) 2.0 a kalpui hnuah nimin thleng khan damlo 2,615 enkawlna senso atan cheng nuai 700 a pechhuak tawh. Mizoram State Healthcare Society hotute chuan kan palai zawhna chhangin, sorkar kum kal mekah MUHCS 2.0-ah hian MUHCS kalpuitu damdawi-inte hnenah damlo an enkawlna senso rulh nan cheng nuai 700 an pek chhuah tawh thu leh hei hi damlo 2,615 enkawlna senso a nih thu an sawi a; thla hmasa chhung khan damlo enkawlna pawisa hi tum 2 pekchhuah niin, kar hmasa khan cheng nuai 400 leh nimin khan cheng nuai 300 an pechhuak a ni.
Healthcare Society hotute chuan damlo bill an dawn reng thu leh a tahtawl tê têin pawisa an pek chhuah zel thu an sawi a, damdawi-inite hnena damlo enkawlna senso pe turin an inbuatsaih leh mek thu leh karleh lamah pawh khian an pek chhuah leh dawn thu an sawi. Tun dinhmunah MUHCS 2.0-ah hian nimin thleng khan pawisa senga inziaklut chhungkua 37,851 an awm tawh a. MUHCS 1.0 ah khan chhungkaw inziaklut 20,213 an awm a, a punna chu chhungkaw 17,638 niin za zela 87 point 26 zet a ni. Sorkarin April ni 28 khan MUHCS hmangtu damdawi-in te hnenah cheng vaibelchhe 3 leh nuai 99 chuang a pe chhuak a, Ningani khan cheng vaibelchhe 3 chuang a pe chhuak leh bawk.
MUHCS 2.0-ah hian inziahluh theih hun hi tun thla ni 15 thleng hawn niin, online hmangin muhcs.mizoram.gov.in ah inziahluh theih a ni a; sorkar hnathawkte, pensioner-te leh golden card neite chu inziahluh a ngai ve lo.
