Kolasib DC In District Jail A Tlawh
Vawiin tlai khan Kolasib Deputy Commissioner Pu H. Dolianbuaia chuan Kolasib District Jail a tlawh a, Jail Superintendent Pu Lalbiakdika leh thawktuten an lo dawngsawng a ni.
DC hian Jail chhung hmun hrang hrang fang kualin, tang (inmates) te a tlawh a, an dinhmun leh an awm dan a hmunah a enfiah a ni. Tangte kawmin DC chuan, an thil tihsualte chuan an nun pumhlum a hril loh thu leh, hmabak eng tak an la nei a ni tih hria a, insiamtha tura inpeih turin a chah a. Jail-a an hun hman chu pawi an lo khawih tawhte siamthat nan leh thil thar zir nana hmang tangkai turin a fuih. An thil tihsualte chu inchhir a, khawtlang tana mi tangkai leh khua leh tui tha tak ni leh turin a chah a, an hmabakah duhsakna a hlan bawk a ni.
Kolasib District Jail-ah hian tun dinhmunah tang 93 an awm mek a, chung zinga 8 te chu hmeichhia an ni. Jail Superintendent Pu Lalbiakdika chuan DC in an hmunhma a rawn tlawh chu lawmawm a tih thu sawiin, an mamawh hrang hrangte a lo thlen nghal a ni.
Tun dinhmunah hian SASCI (Special Assistance to States for Capital Investment) project hnuaiah Kolasib District Jail tihzauh hna (extension) kalpui mek a ni a, hmeichhe tangte awmna tur building thar sak mek a ni bawk.
