Kolasib DC In Thingdawl, Kawnpui Leh Mualvum A Sawrkar Hmun Pawimawh Te A Tlawh
Vawiin khan Kolasib Deputy Commissioner Pu H. Dolianbuaia chuan Thingdawl, Kawnpui leh Mualvum-a sawrkar hmun pawimawh hrang hrangte tlawhin, hmasawnna tur leh mamawh awm te a hmunah a enfiah.
DC hian Thingdawl Nursing School tlawh hmasa berin, Pi Laltanpuii, Principal leh thawktuten lo dawngsawngin an mamawh hrang hrangte an lo thlen a . National Highway 4-lane laih mekin school ram a rawn khawih tel dawn avangin zirlai hmeichhia hlir awmna a nih angin an himna (security) kawngah ngaihtuahawm a nih theih thu leh, school campus hungna (fencing) tha an mamawh zia an lo thlen a. District Development plan tharah rooftop solar panel vuah tura hmalakpui turin DC hi an ngen bawk a ni.
Thingdawl Nursing School hi tunah hian ANM zirna niin, sawrkar laipuiin Nursing College (BSc Nursing) a hlankai (upgrade) a remtih tawh thu leh, infrastructure siam dan tur estimate pawh peihfel tawh a nih thu tarlan a ni a. PWD in hma la mekin AMC inthlan zawh lamah tender kalpui a nih tur thu sawi lan a ni bawk. DC chuan Nursing School mamawhte hi theih anga lo ngaihven zui a tum thu a sawi.
Thingdawl Nursing School tlawh zawh hian Dr. R Lalthlamuana, CMO Koalsib hovin National Highway kawng laitu (construction camp) te tlawhin thosilen 75 an sem a. Kolasib District chu malaria natna tlemna hmun (low malaria zone) a nih angin, hnathawktute chu malaria laka him tura inveng uluk turin an chah a ni.
DC hian Kawnpui Primary Health Centre (PHC) a tlawh chhunzawm a. Kawnpui PHC-ah hian tun dinhmunah Doctor pakhat, Nurse panga, Dental Surgeon pakhat leh staff dangte an awm mek a. An mamawh hrang hrang – dental chair, dental X-ray machine bakah, damlo khum hman lai te chu a hlui tawh avangin a thar an mamawh thu te, damdawi in hungna (fencing) leh thawktu indaihloh thu, a bikin Group-D mamawh a nih thu te DC hnenah hian an lo thlen a ni.
Kawnpui SDO (Civil) Office tlawh chhunzawmin, SDO leh thawktute nen office thuamthat dan tur leh tihchangtlun theih dan tur te sawiho bawk.
Hemi hnu hian Mualvum-a 1st IR Battalion Headquarters tlawh lehin, Commandant leh a naute’n an lo dawngsawng a. Battalion hmuna security, infrastructure leh hmasawnna tur tlangpui te an sawi ho nghal bawk a ni.
Vawiina DC in Kolasib a Sawrkar hmun hrang hrang a tlawhna ah hian Chief Medical Officer, Addl. SP, SDO (Civil) Kawnpui leh District Information & Public Relations Officer (DIPRO) Kolasib ten an tawiawm a ni.
