AMC Inthlanpui 2026 ah tluang taka vote thlak zawh fel a ni
Boruak muanawm tak hnuaiah tukin zing dar 7:00 atang khan AMC Inthlanpui 2026 atan vote thlak tan a ni a. Tlai dar 5:00 thleng vote thlak hun hi hawn niin tluang taka vote thlak hi zawhfel a ni. Vote tla zat hi a vaiin 1,46,719; Mipa 66,415 leh hmeichhia 80,304 a ni. Vote tlak dan kimchang chu sec.mizoram.gov.in/page/ge-to-amc-2026-poll-day-report-results atang hian en theih a ni.
AMC hnuaiah hian Ward 19 awmin, AMC Inthlanpui 2026 ah hian INC, MNF leh ZPM te chuan Ward 19-ah candidate an nei vek a; BJP erawh chuan Ward 11-ah candidate an nei thung. Candidate te hi an vaiin 68, hmeichhia- 27 leh mipa- 41 an ni a. Ward 6, heng: Ward –II,IV,V,XI,XII leh XVII te hi hmeichhe tana reserved ward an ni. AMC hnuaiah hian Local Council 89 leh Polling Station 264 a awm mek a. AMC Inthlanpui 2026-ah hian Electronic Voting Machine hman niin VVPAT (Voter Verifiable Paper Audit Trail) erawh hman a ni lo.
Tun tum inthlanpuia hman tak Electoral Roll-ah hian voter awm zat chu hmeichhia – 1,29,650 leh Mipa – 1,10,335 an ni a, an vaiin voter hi 2,39,985 an awm a, mipa aia hmeichhia an tamna chu 19,315 a ni. Voter tamna ber Ward hi WARD XVIII niin, voter 18,906 an awm a. A tlemna ber Ward hi WARD VIII niin, voters 7975 an awm thung.
Polling station pan theilo kum upa te, damlo natna khirh bik nei te leh pianphunga rualbanlo te tana vote thlak theihna tura ruahman, Home Voting chu ni 13.4.2026 (Thawhtanni) atanga ni 16.4.2026 (Ningani) thleng khan kalpui a ni a, vote tla 2768 (93.71%) a awm a ni.
AMC Inthlanpui 2026 hi felfai, thianghlim leh langtlang taka kalpui a nih theih nan, Polling Station tina hman tur EVM leh vote thlak buaipuitu tur polling personnel te hi computer hmanga 1st, 2nd leh 3rd Randomization kaltlanga thlanchhuah, thliarhran leh semdarh (Randomize) an ni. Vote thlak zawhah EVM te hi General Observer te leh Political Party aiawhte hriatpuina hnuaiah DC Office Strong Room-ah dahluh leh vek an ni ang.
AMC Inthlanpui 2026 result hi April 27, 2026 (Thawhtanni) zing dar 8:00 atanga chhiar tan tura ruahman a ni a. Re-Poll ngai a awm a nih chuan April ni 23, 2026 (Ningani) zing dar 7:00 atanga tlai dar 5:00 chhungin Re-Poll neih a ni ang.
