Khawzawlah ruihhlo ngaite enkawl dan tur chungchang sawiho
Vawiin khan Khawzawl DC Chamber-ah ruihhlo ngaite enkawl dan tur chungchang sawiho turin meeting neih a ni a, he hunah hian Khawzawl District Level Task Force on Ruihhlo Do leh kohran hrang hrang Bial hruaitu te telin Khawzawl Bawrhsap Pu K Vanlalthiana’n a kaihruai a ni.
Khawzawl Bawrhsap Pu K Vanlalthiana chuan ruihhlo chu hnam hmelhma lian ber a ni a, a do kawngah meeting a lo kal khawm te chu tha taka an thawh ho theih a beisei thu a sawi a. Ruihhlo bawih a tang mek te chu an fihlim theihna tur kawngah a theih ang anga pui tur leh an hmalaknaah te lawmthu sawiin a hma aia tan la nasa leh zual turin a sawm a ni.
He meeting-ah hian Khawzawl District chhunga ruihhlo ngaite tana hmalak dan tur rel niin camping buatsaih tum a ni a, hemi atan hian Health and Family Welfare department chuan ruahmanna an siam ang a, SP office chuan a hmunhma tur a ngaihtuah ang a, Khawzawl a kohhran hrang hrang bial hruaitu te chuan he ruahmannaa an tel theih dan tur an lo ngaihtuah bawk ang. April thlaa thutkhawm leh tum a ni a, YMA chuan ruihhlo ngaite lut tur ang chi te lo thliar hrang se tih a ni.
