FCS&CA Minister-In Aizawl East leh West DCSO Sak Thar Tur Lungphum A Phum

Vawiin khan Pu B. Lalchhanzova, Minister, Food, Civil Supplies and Consumers Affairs (FCS&CA) Department chuan Aizawl East leh Aizawl West District Civil Supplies Office (DCSO) building sak thar tur lungphum chu MINECO-ah a phum.

Minister Pu B. Lalchhanzova chuan thu sawiin, Aizawl district-a DCSO Office pahnih awmte chu an awmna a inhlat deuh avang leh office building pahnihte chu mimal in, sum chawia luah a nih ve ve avangin mahni puala office thar a ding tur chu lawawm a tih thu a sawi a. Kum 39 chhung office atan mimal in luah a nih hnua mahni puala office tha tak an nei ve tawh tur chu lawmawm a tih thu a sawi bawk a. Miniser chuan office hlui leh chul rup mai hian a thawktu leh a dawrtute rilru thui takin a nghawng thu sawiin, office thar tha tak an neih hunah chuan thawktute pawh phurna nasa zawk a pek a beisei thu a sawi a. Mahni bialtu DCSO hriat fuh loh avangte, DCSO awmna in sawn ngaite leh office pahnih dawr kawp ngaite tan chuan DCSO pahnihte hmunkhata dah khawm anni tur chu awlsamna thlentu a nih bakah sum leh hun tamtak hum saktu a nih a beisei thu a sawi bawk.

Aizawl East leh West DCSO building hi cheng Vaibelchhe 8 senga SASCI 2024-25 (Part – I) atanga sak tur niin, Mizopa chhiara chhawng 6-a sak tur a ni a. A building pum hi square feet 18,341 tura ruahman a ni a, thla 30 chhunga sak zawh tura ruahman a ni. A sak hna hi Eastmen Consultancy, Aizawl ten an thawk dawn a ni.

Lungphum phumna hun hi FCS&CA Secretary Pi Teresy Vanlalhruaii’n a kaihruaia a, a sak hna thawk tur Eastmen Consultancy-ten hna kalpui dan turte sawifiahin, FCS&CA Addl. Secretary Dr Andrew H. Vanlaldika’n kalkhawmte lawmthu hrilhin hun a khar a ni.