Lungleiah UD&PA Director leh LMC hotute’n UD&PA hnuaia hma lakna hrang hrang an sawi ho
Vawiin khan Urban Development & Poverty Alleviation (UD&PA) Department Director Pu Jacob Lalawmpuia leh Lunglei Municipal Council (LMC) hotute chu LMC BoC Hall-ah an ṭhu khawm a. Lunglei khawpui chhunga UD&PA Department hma lakna hrang hrang an sawi ho.
He ṭhut khawm hi LMC Chairman Pu Lalzuithanga’n kaihruaiin, LMC councillor-te, LMC leh UD&PA official-te an tel a. Lunglei khawpui bawlhhlawh paihna hman mek aṭanga bawlhhlawh leh meikhu chhuak ṭhinin Hauruang leh Sazaikawn khawtlangte tana harsatna a thlen thu tar lan niin, UD&PA Department leh LMC hotute chuan hei hi pawi an tih thu leh chin fel vat theih an beisei thu an sawi a. He harsatna hi tihtawp leh chin fel a nih theih nana hma lak dan tur sawi hovin, he harsatna hi pumpelh turin felfai taka bawlhhlawh sawngbawlna hmun thar tur, Solid Waste Management Centre chu zawh fel ṭep a nih thu leh Centre-a khawl hman turte pawh ngaihtuah mek a nih thu tar lan a ni.
Ṭhut khawm zawhah hian Lunglei Solid Waste Management Centre-I sak mek leh Lunglei bawlhhlawh paihna hmun chu LMC Vice Chairman Pu K. Lalrinawma leh Councillor-te, UD&PA Director Pu Jacob Lalawmpuia te, LMC leh UD&PA official-te leh Sazaikawn Local Council te nen tlawh nghal a ni a. Bawlhhlawh inchhek khawm sa buaipui dan tur en ho niin, Legacy Waste Remediation Project chu a hma thei ang bera kalpui a nih theih nan bawlhhlawh paih lailawkna hmun tur en fel a ni.
Legacy Waste Remediation Project-ah hian bawlhhlawh inchhek khawm sa chu Pollution Control Board-in dan an duan sa ang thlapa singsak a, bawlhhlawh inchhek khawm sate pawh hai chhuak vek tura ruahman a ni a. Project hi a hma thei ang bera ṭan turin ruahman a ni.
