Sports minister in k. Lalnunsanga lawmpuina hun hmang
Vawiin chawhnu khan Pu Lalnghinglova Hmar, Minister of State, Sports & Youth Services Department chuan FMSCI Indian National Motorcyle Racing Championship 2025 a an inelna huanga pahnihna ni thei K. Lalnunsanga chu MINECO a a office chamber-ah lawmpuina hun a hmanpui a, lawmpuina pawisa fai a hlan tel. K. Lalnunsanga, Electric Veng, Aizawl hi MRF leh Madras Motorsports Club in a buatsaih Federation of Motor Sports Clubs of India (FMSCI) Indian National Motorcycle Racing Championship (INMRC) 2025-ah hian Stock 130 – 165cc Novice Category-ah inel in a pumpuiah pahnihna a ni. June 2025 atang January 2026 chhung khan round nga inelna neih niin intlansiak vawi 10 tlan a ni a, Nunsanga hi vawi hnih pakhatna niin vawi li pahnihna a ni bawk a ni.
Pu Lalnghinglova Hmar chuan, “Kan infiammite tupawhin hlawhtlinna an chan hian sorkar chu kan lawm thin a, India ram huap ang inelnaah phei chuan Mizo tihmingtha tu an ni a, kan chhuang thin a ni. Nunsanga pawh national level a hetiang a thleng thei hi kan lawm hle.” tiin a lawmpui thu a sawi a. Mizoram MotorSports Association hruaitute chu fak bawkin, “MIMSA inpekna hi a hlu a, motorsports lam hi a senso te a danglam deuh avangin a hautak hma a, Mizoram State Sports Council in budget tam tak kan pe thei lo chung pawhin hruaitute lam an tang hram hram thin a, fak an phu tak zet a ni.” a ti. Minister hian Mizote hi infiamna lamah hmasawnna tur erawh kan la ngah hle thu sawi tel bawkin, “Infiamna discipline hrang hrangah achievement tha kan nei ve ta fova, a lawmawm. Mahse hmabak a la thui hle a, tun aia sang kan thlen zel a ngai.
Hetia hlawhtlinna zuk neite hian a piah lama hmasawnna tur la tamzia an zuk hmu a, inzirna tur a la tam zia an zuk hrechiang thin a ni.” a ti bawk. Dr. Lalhmuchhuaka, Vice President, Mizoram State Sports Council pawhin thu sawiin, sports association hruaitute tan chuan nihna hlawkpui tum lova, a chang phei chuan chan zawk nih huama infiammite kaihhruai leh phurpui a pawimawh tih a sawi. He hunah hian Nunsanga chuan an inel dan chungchangte leh a hun zuk hman dante a sawi a. MIMSA lam pawhin thu sawiin Sport Minister in a duhsakna leh ngaihsakna avangin lawmthu an sawi a ni.
