Horticulture Minister hovin inhlanthar
Horticulture Department a thawkte chuan vawiin khan an Minister Pu C Lalsawivunga hovin Horticulture Directorate Conference Hall, Aizawlah kum thar inhlantharna leh intuaitharna hun an hmang a. Minister hian Horticulture Department lehkhabu pathum- Sapthei chin leh enkawl dan, Thlai venhimna damdawi him leh dik taka hman dan leh Viticulture Manual (Grape chin leh enkawl dan) te a tlangzarh nghal a ni.
He hunah hian khuallian chuan thu sawiin, Department pakhata kan awm avangin inunauna, inpumkhatna, thawhhona ṭha kan neih a ṭul a, chhungkua kan nih angin kan ram tan, mipuite tan Pathianin thiamna leh finna talent min pekte chhawr ṭangkai tur kan ni, a ti a. Mipuiin an dawr thin kan nih avangin mi te berte leh kut hnathawk mite rawn theih; mi tu pawhin an koh eih theih, an mamawh an rawn lam ngamna kan ni tur a ni a. Mi tupawh ina an mi hman ṭangkai theih tur, an mi chhawr theih tur kan ni tur a ni, a ti.
Minister chuan sawrkarin sawhthing kan buaipui a, he sawhthing hmang hian kut hnathawktu dinhmun engtin nge kan dawm kang dâwn, engtin nge revenue kan neih belh theih ang tih thlengin in ngaihtuahnaah awm sela. Sawhthing Flagship Programme hi kan number one ah dah ang u a ti a, hmarcha leh aieng bikah hian theihtawp kan chhuah dâwn bawk a ni, a ti.
Vawiin inhlantharna huna report pekah sapthei hi Mizoramah hian 1004 Ha a zau velah chin a nih thu leh, 2230 tonnes vel kum tin thar chhuah a nih thu tarlan a ni a. India ramah chuan Mizoram hi Sapthei chin tamna ber te zinga mi a nih thu leh, export leh processing potential nei tha tak a nih avangin Department pawhin sap thei chinna kawngah nasa taka hmalak zel a tum tih tarlan a ni a. Grape pawh Mizorama thlai pawimawh tak nia nih chhoh mek thu leh Champhai district-ah kuthnawkthawktuten hlawkna an hmuh mekthu tarlan niin, heng thlai pahnih chin leh enkawl dan bakah, thlai venhimna damdawi hman dan kuthnathawktuten an thiam theih nan Minister-i’n lehkhabu pathum a release chu Horticulture Department-I’n an buatsaih thu tarlan a ni.
Horticulture Secretary Pi Maria CT Zuali’n programme hi a kaihruai a, Joint Director Pu C. Zosangliana’n hunserh hmangin Deputy Director Dr. H. Vanlaldikin January thla tir lama Department hotuten Karnataka a sawhthing an chin tamna leh enkawlna hmun Hassan District-a an zinna report pein entawn tlâk an nih thu a sawi a, Director Pu CH Lalmuanpuia’n lawmthu sawiin hun a khar a ni.
