Home Minister leh Excise Minister hoin CYMA nen ruihhlo do sawiho
Vawiin khan Home Minister Pu K Sapdanga leh Excise and Narcotics Minister Pu Lalnghinglova hoin Central YMA hotute leh sorkar mi pawimawhte’n Mizorama ruihhlo do kalpui dan tur an sawiho a, Myanmar remria ruihhlo do beihpui neih mêk ‘Operation Jericho’ chu March 2026 thleng kalpui zel ni se, tiin an rel.
Home Minister Pu K Sapdanga chuan, “Mizorama ruihhlo do runpui kan kalpui mekin rah ṭha a chhuah tih report hrang hrang kan dawng khawm hi a lawmawm kan ti a, chutihlaiin a la tawk lo hle tih erawh kan hre tlâng a, ramria ruihhlo do runpui neih pawh sei zel hi a ṭul a ni,” tiin ruihhlo do kawnga Central YMA hnathawh chu lawmawm a tih thu a sawi rualin Police leh Excise lam thawhrimna fakawm a tih thu a sawi.
Excise Minister Pu Lalnghinglova Hmar chuan ruihhlo do beihpui thlak a nih hnuah tunlai hian Aizawl khawpuiah Heroine No. 4 man a to hle tih sawiin, “Ruihhlo a vang tak tak em tih finfiah theih ni lo mah se ruihhlo man a sang hian a vang tih a entirah kan ngai,” a ti a, hemi kawnga sorkar leh YMA thawhhona chu lawmawn a tih thu a sawi a, Operation Jericho neih a nih hnuah ruihhlo lo luhna pawh a inthlak a, hna a pun belh zel tih a sawi.
Central YMA President Pu Lalngheta chuan YMA-in thapui thawhin ruihhlo do an kalpui zel dawn tih a sawi a, ruihhlo ngai pung khawm ṭhin senghawi kawngah YMA chuan chak takin kal a tum thu a sawi a, sorkar nen ṭang ruala hmalak dan rawtna hrang hrang a sawi.
