Social Welfare Minister Pi Lalrinpuii’n Lungleiah upate dinhmun leh harsatna zir hona hun a hmanpui
Vawiin khan Mizoram sawrkara Social Welfare, Women and Child Development Minister Pi Lalrinpuii chuan Lunglei Convention Centre-ah upate dinhmun leh harsatna zir hona, “One day Workshop on Elderly Issues” hun a hmanpui. He hun hi Regional Resource Training Centre (RRTC) for Senior Citizens, Mission Foundation Movement (MFM) buatsaih niin, Lunglei veng hrang hrang Mizo Upa Pawl (MUP) unit 24 aṭangin member 267-in an chhim a ni.
Social Welfare Minister Pi Lalrinpuii chuan upate chu ram leh khawtlang innghahna (backbone), hnam nunphung, hlutna leh finnate vawng nungtu leh ṭhangtharte hnena hlan chhawngtu an nih thu sawiin, Mission Foundation Movement-in upate zahawmna leh hriselna ngai pawimawha hma an lakna chu fakawm a tih thu a sawi a. Khawvel inthlak danglam zelah upate’n hriselna lama harsatna te, nun khawharna leh an dikna leh chanvo hriat tawk lohna avanga harsatna hrang hrangte an tawk ṭhin tih sawiin, chu’ng an harsatnate chu sut kianpui turin sawrkar leh khawtlang ṭang ruala hma lak leh inzirtir a ṭul thu a sawi a.
Mizoram sawrkarin sawrkar laipui nen thawk hovin upate himna, hriselna leh zahawmna vawng nung turin hma a la reng tih sawiin, upate tana ruahmanna hrang hrang kalpui zingah sum leh paia upate ṭanpuina leh chhawmdawlna, National Social Assistance Programme (NSAP) hnuaiah upate’n thla tina pension an dawn theihna (Indira Gandhi National Old Age Pension Scheme) te; upate enkawlna leh an dikna humhalhna dan pawimawh tak, Maintenance and Welfare of Parents and Senior Citizens Act te; upate enkawlna hmun (Old Age Home) te kalpui a nih thu a sawi a. Upate sum leh paia ṭanpui chauh ni lovin, khawtlangah inthliar hranna awm lova hrisel tak leh hlim taka nun an hman theihna tura hma lak chu sawrkarin a tum ber a nih thu a sawi.
