Health & family welfare minister pi lalrinpuii chuan a bial chhung khaw panga a buatsaih ayush health camp 2025 a hawng
Vawiin khan Health & Family Welfare Department Minister, Pi Lalrinpuii chuan a bial chhung khaw panga(5) – Leite, Rotlang East, Dawn, Ralvawng leh Hlumte-ah te ‘AYUSH Health Camp 2025’ Integrated Ayush Hospital, Thenzawl a thawktuten an buatsaih chu YMA Run, Leite-ah a hawng a, a bial chhung mi harsate hnenah tanpuina thilpek a hlan nghal bawk. AYUSH Health Camp 2025 hawnna inkhawm hi Leite VCP, Pu K. Lalnunpuia chuan a kaihruai a ni.
Minister, Pi Lalrinpuii chuan a bial mipuite tana AYUSH Health Camp buatsaih a ni thei chu lawmawm a tih thu sawiin AYUSH hi India rama natna enkawl dan hrang hrang (System of Medicine) khaikhawmna a nih thu a sawi a. Hengte hi India ram chhulchhuak leh Germany chhuak (Homeopathy), India in a lo seng luh te an nih thu tarlangin AYUSH hi heng system of medicine – AYURVEDA, YOGA, UNANI, SIDDHA leh HOMEOPATHY te hming bul theuh lak a, phuah chhuah a nih thu a tarlang a. Kum 2014 khan Central-ah Ministry hran neiin a lo awm thu sawiin Ministry of AYUSH hian India rama AYUSH Zirna in hrang hrangte, Research neihna hmunte, damlo enkawlna lamte bakah AYUSH hnuaia Programme hrang hrang te a enkawl thu tarlang bawk.
Minister chuan District Hospital te, Community Health Centre hrang hrang te, PHC thenkhat leh Health & Wellness centre AYUSH Directorate in an enkawl ho ah te AYUSH Doctor te rawn theih reng an nih thu sawiin AYUSH Damdawite damlo hnenah a thlawna pek an ni thin an nih thu a sawi a. Integrated AYUSH hospital, khum 50 awmna Thenzawlah a awm thu sawiin he Hospital-ah hian natna hrang hrang OPD leh IPD ah te enkawl an nih thin thu a tarlang a. PanchaKarma Therapy kan tih, Ayurvedic special treatment of Medicine, Mizo ten natna kan neih nasat heng : tha na, ruh na, ruh seh, nerve tha lo leh stroke tawh te thleng pawhin therapy hi pek theih an nih thu a tarlang. Heng natna te hi hlawhtling taka enkawl tam tak an awm tawh thu sawiin Mizoram hmun hrang hrang atangin Therapy la tur hian Integrated Ayush Hospital, Thenzawl hi an rawn pan thin thu a sawi bawk.
