Vijay Diwas 2025 pualin Chief Minister hovin War Memorial-ah martarte hriatrengna leh zahna hun hmang
India ram hmun dangte rualin tukin dar 8:00 khan Vijay Diwas (Hnehna Ni) pualin War Memorial, Treasury Square-ah Chief Minister Pu Lalduhoma hovin sipai huaisen, ram tana nun hlantute hriatrengna leh zahna lantirna hun hman a ni.
Pu Lalduhoma chuan hma hruaiin Sipai huaisen martarte zahna lantir nan War Memorial-ah pangpar a dah a, Home Minister Pu K. Sapdanga te, Lt. Col. Clement Lalhmingthanga (Retd.), MLA & President, MESL te, Pu Khilli Ram Meena, Chief Secretary, Pu Sharad Agarwal, DGP Mizoram, Pu Vanlalmawia, Home Secretary, Padma Shree Hav Lalbiakthanga, President, World War-II Veterans Association leh midangten pangpar hi an dah zui a ni.
December ni 16, 1971 khan Ramna Race Course tuna Suhrawardy Udyan ni ta, Dhaka khawpui, Bangladesh-ah India Sipai hotu Lt. Gen. Jasgit Singh Aurora kaihhruai Allied Forces (India sipai leh Mukti Bahini) hmaah Pakistan sipai lalber (Chief of the Pakistan Forces) Lt. Gen. Amir Abdullah Khan Niazi leh a sipai 93,000 te chu Indo-Pakistan War of 1971 ah India laka tlawmin an inpe a. He hnehna vang hian East Pakistan, tuna Bangladesh tia thlak tak hian Pakistan atangin zalenna a hmuh phah a ni. He ni hriatrengna atan hian kumtin Vijay Diwas hi India ram hmun tinah leh Bangladesh-ahte December ni 16 ah hman thin a ni.
