Rural development minister prof. Lalnilawma’n thingdawl rd block golden jubilee hmanpuiin panchayat bhavan cum bdo office building thar a hawng
Vawiin khan Rural Development & Administration Department Minister of State Prof. Lalnilawma chuan Thingdawl RD Block kum 50 tlin lawmna (Golden Jubilee) a hmanpui a. He hunah hian Thingdawl Panchyat bhavan cum BFO Office building thar sak chu a hawng nghal bawk. Khuallian Prof. Lalnilawma Minister of State for Rural Development chuan Thingdawl RD Block-in kum 50 hmel a hmuh theih avang leh Office building thar tha tak an nei thei chu lawmawm a tih thu a sawi a. Minister chuan Rural Development lam chu a tuichilh zia sawiin, RD ah hian PhD Degree neiin Department-ah OSD hna te leh SIRD leh MZU lamahte a lo thawh tawh thin thu a sawi a. Rural Development Department hnuaiah mi tam takin malsawmna an dawng tawh a, IAY atanga in sak tanpuina te an dawng a, chuta tanga eizawnna ngelnghet neih phah ta hial te pawh an awm a ni, a ti. Chutih rualin tanpuina dawng si, a hmanna tur dik taka hmang lo erawh an awm thin chu pawi a tih thu a sawi a. SHG hmalakna hrang hrangah hlawhtlinna hmuh tur a awm chu lawmawm a tih thu a tarlang bawk.Minister chuan tunlai khawvelah danglamna kan hmu chho zel a, thil tha ti duh leh ngaihtuahna tha pu kan pun belh zel chu lawmawm a tih thu sawiin, thil tha tih kawngah inelna thianghlim neih a pawimawh thu a sawi a.
“Rinawmna hi hmasawnna lungphum a ni,” tiin MGNREGA hnuaia hna te pawh a danin a phut anga rinawm taka thawh a pawimawh a ni, a ti. Department thawktute fuihin Minister chuan, “Thawktute pawhin an hun tam zawk Office-a an hman thin avangin Office nuam leh tha an phu a; amaherawhchu, sorkar hnathawkte chu mipui rawngbawltu an nih angin kan awm chhan hriaa mipuite lakah hawihhawm tak leh dawhthei taka rawngbawl hna thawk tur kan ni,” a ti a. Office thar chu mipuite tana malsawmna a nih ngei a beisei thu a sawi a ni. He hunah hian Tuirial bialtu MLA Pu K. Laldawngliana pawhin thu sawiin, Panchyat Bhavan leh BDO Office building sak a nih theih nana thawktu zawng zawngte chungah lawmthu a sawi a. BDO Office chu mipui dawr ber anih avangin kawtzawl tha leh building tha neih a tul tih chu sorkar hmasa atanga amah ngei pawhin a lo ngaih pawimawh thin a nih thu a sawi a. Building chhunga awmte leh a dawrtute chu an pawimawh thu sawiin, BDO staff-te chu midang tana malsawmna ni turin a chah bawk a ni.
Hun kaihruaitu Dr. Doris Lalrinawmi, BDO, Thingdawl RD Block in inlawmna thu sawiin Thingdawl RD Block kum 50 tlinna (Golden Jubilee) leh Office building thar hawnna hun a ruala neih a ni chu lawmawm a tih thu sawi a. Thingdawl RD Block chu kum 1974-a din a nih thu leh tun dinhmunah Village Council (VC) 20 an awm mek thu a tarlang. Pu Lalmuan Puia, Project Director,DRDO Kolasib pawhin thu sawiin Building sak chungchang ah report tawi a pe a. Office Building sak nan hian cheng nuai 204, singkua leh sangruk (Rs. 20,496,000) ruahman niin, phase 5 a then a ni a. September ni 29, 2023 khan a lungphum phum a ni a, kumin July thla khan sak zawh a ni. Building hi Basement leh Ground Floor chhiar telin chhawng nga (5) a sang a ni. Office building sak hna a hlawhtlin theih nana tha thawhtu zawng zawngte chungah lawmthu sawiin, a bikin VC te leh mipuite tawiawmnaah lawmthu a sawi nghal bawk a ni.
