Mizoram Veterinary Service Association ten Golden Jubilee lawm
Vawiin khan AITI, Selesihah Mizoram Veterinary Service Association ten an kum sawmngana an lawm. He hun hi AH&Vety minister Pu C.Lalsawivunga’n khuallian niin a hmanpui. Khuallian minister Pu Sawivunga chuan MVSA ten kum sawmngana tluang takin an thleng thei chu a lawmpui thu a sawi a. Mizoram ei leh bara kan intodelh theihna tura an thiamna leh finna te hmanga, ram leh hnam tana thahnemngai taka thawk zel turin a fuiha, mahni hmazawna hna te rinawmna nen inhlan thar chunga thawk zel turin a chah bawk.
Golden jubilee lawmna hi chawhma hunah Jubilee Dar vuaka bul tanin, Dr TC Lalthanzauva Vice President MVSA in a kaihruaia, member thar lawmluh, Golden Jubilee organizing committee secretary report, Jubilee cake zai leh hruaitu hlui chawimawina hun hman a ni a, chawhnu hun Dr Robert Rualthankhuma, President, MVSA in a kaihruaia, souvenir/magazine release, Secretary report leh khuallian baka Pu Lalsangliana Secretary leh Dr R.Zothanmawii Director hnen atangin thusawi ngaihthlak a ni.
MVSA hi a tirah ‘The Vets Association of Mizoram’ tiin October ni 15, 1975 khan Dr Zokhuma In, Chawnpui, Aizawlah din a ni a, Conference hmasa ber chu Ni 6-7 June 1980 khan MHIP Hall, Khatlaah neih a ni. Ni 22 April 1999 a General Body meeting in rawtna a dawn angin lungrual takin ‘Mizoram Veterinary Service Association ‘ tiin a thlak ta a ni. Kum 2000 atangin MVSA hruaitu thlan tan a ni a, MVSA ah hian tun thlengin service member mi 169 an awm tawh a, chung zingah chuan chatuan ram pan ta mi 29 awmin, mi 57 te chu Departmentah pension thlengin an thawk a, mi 7 in hna dang zawmin service an chhuahsan bawk, Tun dinhmunah post 115 awmah thawk lai mi 76 an awm.CM relief fund ah kum 1989 atanga 2025 thlengin vawi ruk chhung tawhin avaiin Rs 3,28,000 an lo chhung tawh bawk a ni.
