Mizoram ceo leh political party aiawhte inkawm
Vawiin chawhnu khan CEO Office, MINECO, Khatlaah Dr. Lalrozama, Chief Electoral Officer, Mizoram chuan 2-Dampa (ST) Assembly Constituency-a Bye Election nei tura inbuatsaihna kalpui dan chungchangah Political Party hrang hrang aiawhte chu a pisaah a kawm a. Bye Election neih tura vote thlak nana hman tur EVM khawlte pawh en dik zel a nih thu leh Web Casting nei thei turin Polling Station-te pawh buatsaih mek a nih thu a sawi. Mizoram Chief Electoral Officer Dr. Lalrozama chuan 2-Dampa (ST) AC-a Bye Election kalpui tura inbuatsaihna kal zelah Political party hrang hrang atangin CEO Office hmalaknain thlawpna tha tak an hmuh thin thu a sawi a.
Inthlanna thianghlim, dik leh langtlang kalpui a nih theih nan Election Commission of India thuchhuak ngai pawimawh turin leh Model Code of Conduct zawm zel turin Political Party aiawh kalkhawmte chu a chah a ni. Mizoram CEO chuan September ni 30, 2025-a Electoral Roll thar ber tichhuaha tarlan danin Dampa AC chhungah hian voter 20790 awmin mipa 10605 leh hmeichhia 10185 an awm thu a tarlang a. Polling Station 41 zingah Silsury-I ah voter tam berin mi 1103 an awm a, voter 30 awmna Zopui PS chu voter tlemna ber a nih thu a sawi. CEO Dr. Lalrozama chuan Mizoram chu State dangte tana entawn tlak ni turin inthlanna felfai, langtlang leh thianghlim kalpuina kawngah Political Party hrang hrang aiawh kalkhawmte chu thawhhopuiah a sawm a. Election kalpuina tura inkaihhruaina chungchanga hriatchian duh an nei a nih chuan CEO Office chu biak pawh theih reng a nih thu a sawi bawk a ni.
2-Dampa (ST) AC Bye Election chungchanga inkawm hona hunah hian Pi Ethel Rothangpuii, Jt. CEO chuan inbuatsaihna hrang hrang kalpui dan a sawi fiah a, Pu Hmingthanzuala, IPRO chuan Print leh Electronic Advertisement chhuah chungchanga phalna lak ngaite a sawi fiah bawk a ni. Thutkhawm ah hian BJP, MPCC, AAP, ZPM leh MNF party aiawhte an tel a ni.
