“Taksa insawizawina hi zirlaibu piahlamah a tha zawnga nungchang kaihruaitu a ni thei”- Minister of Higher & Technical Education
Minister of Higher and Technical Education Dr. Vanlalthlana chuan vawiin khan Dawrpui Multipurpose Hall-a Govt. Aizawl West College Week kharna hun a hmanpui naah thu sawiin, zirchianna hrang hrangin a tarlan dan in zirlai piah lamah taksa inzawizawina te, sports intihsiakna te chu rilru ti harh a, tumruhna siamtu leh puitlin inzirna tha tak a nih thu a sawi.
Minister chuan zirlaite chu an zirlaiah theihtawp chhuah tur an nih rualin an ngaihtuahna leh khawthlir tihhmasawn a tihzau nan syllabus pawn lam lehkhabu tha tak takte chhiar uar tel turin a chah a. Tuna college zirlaite khawvel hmachhawn tur chu tun hma generation te nen a inan tawh loh thu sawiin, graduate hnu a hna an zawn hunah mahni mihringpui te chauh nilo in, hna peng tam takah chuan AI nen an inel a la ngaih chhoh thu te a sawi a. Chumi avang chuan kawng engkimah mahni theuh hma kan sawna, kan thlen san theih ber dinhmun luah tum turin zirlaite Minister chuan a chah a. Chutihrual chuan mihring chu hahchawlh leh hahdam duh leh mamawh thin kan nih thu sawiin, hahchawlh duh avanga ruihtheihthil leh chin thalo lam pan ta mai lo a nun fimkhur leh uluk turin zirlaite chu a chah bawk a ni.
Govt. Aizawl West College Week a intihsiakna hrang hranga tithate hnenah Minister hian lawmman a hlan bawk a ni. Govt. Aizawl West College ah hian zirlai 700 bawr vel an awm a ni.
