Lunglei Lunglawnah 2 Mizo Battalion NCC-in Vibrant Village Programme an buatsaih
National Cadet Corps (NCC) Group Headquarters, Silchar thu chhuak bawhzuiin, Combined Annual Training Camp-90 kal mekah vawiin khan 2 Mizo Battalion NCC, Lunglei chuan Lunglei Lunglawnah hlawhtling takin Vibrant Village Programme an buatsaih.
Vibrant Village Programme-ah hian Commanding Officer, Colonel Sagar K. Mohanty hovin, 2 Mizo Bn NCC officer leh staff-te, NCC cadet 247 leh Lunglawn Local Council member-te, YMA hruaitute leh khawtlang mipui mi 87 vel an tel a. Zuk leh hmuam leh ruihhlo dona kawng zawh buatsaih niin, NCC cadet-te leh khawtlang ṭhalaite’n inhmelhriatna football leh volleyball an khel a. Excise & Narcotics Department official-te’n ruihhlo leh zuk leh hmuam ṭhat lohzia zirtirna hun an hmang bawk.
He programme hi khawtlang mipuite’n vaihlo leh ruihhlo ṭhat lohzia inzirtir tharna atan te, infiamna leh hriselna lama ṭhalaite fuihtu atan leh sawrkar leh khawtlang thawh hona ṭha pawimawhzia zirna atan te ṭangkai takin an hmang a. Cadet-te pawhin vaihlo leh ruihhlo ṭhat lohzia te, hruaitu nih leh mi dang nena thawh ho dan te leh khawtlanga mawhphurhna hrang hrang zirna atan te ṭangkai takin an hmang bawk.
