Lungleiah leilung dan mila huan thlai enkawl dan zirtirtu tur (CRP)-te training buatsaih a ni
Vawiin khan Agriculture Conference Hall, Lungleiah National Mission on Natural Farming (NMNF) hnuaia leilung dan mila huan thlai enkawl kalpui tura Lunglei District zau hrang hranga Community Resource Person (CRP)-te tan training buatsaih a ni.
Training hi Assistant District Agriculture Officer (ADAO) Pu K. Lalrinfela’n a kaihruai a. Krishi Vigyan Kendra (KVK) Lunglei District-a Subject Matter Specialist (Agronomy) Pu F. Lalṭhasanga’n training hi pein, zawhna leh chhanna leh sawi hona hun hman a ni bawk.
Natural Farming hi damdawi (chemical) tel lo va, tualchhunga bawng ek leiṭha te, bawng zun leh ran ek leh hnim ṭawih leiṭha (organic manure) hmanga huan thlai enkawl kalpuina tur a ni a. Natural Farming hnuaiah hian Lunglei District-ah zau (cluster) 15 awmin, cluster pakhatah kut hna thawktu 125 zel thlan chhuah an ni a. Anni vil tur hian cluster tinah CRP pahnih zel ruat an ni.
