AIZAWL KHAWPUI CHHUNGA DAMDAWI DAWR ENDIK
Aizawl District Magistrate Er. Lalhriatpuia, IAS in naupang kumtling lo leh School Uniform ha ten damdawi ruih nana hmanchi an lei tur ven nana damdawi dawr (heng damdawi kawl pha chin) te chuan an dawrah damdawi leitu te lang thei ngei tura CCTV vuah vek tur a nih thu Order a lo siam tawh bawhzuiin vawiin khan khan Pu John Lalramhluna Hnamte, Executive Magistrate hovin FDA(H&FW Department) atangin Drugs Inspector leh Police Department te tangkawp chuan Joint Inspection an nei. He inspection-ah hian Civil Hospital, Aizawl chhehvel-a Pharmacy 64 te endik an ni a, a tlangpuiin Pharmacy te hian District Magistrate thuchhuak hi an zawm tha hle. Amaherawhchu, heng Pharmacy zinga 7 te hian CCTV hi an la vuah(installed) lova, heng mite chungah hian a tul anga hmalak chhunzawm a ni dawn a ni.
Heng Pharmacy endik zinga 31 te hian damdawi ruih nana hman theih chi te leh Antibiotic hralh fimkhur ngai bikte ziahna tur, Schedule H1 Register an vawng tha lo. Heng Damdawi dawr zingah hian Pharmacist thutchilh dawr 17 chauh an awm a, a dang zawng te hian Pharmacist enpui lohvin damdawi an enkawlin, an pe chhuak thin a ni tih hmuh a ni.
Heng dan, Pharmacy Act, 1948 leh Drugs Rules, 1945 te hian Pharmacist chu damdawi dawrah awm tlatin, a enpuina hnuaiah ngei damlo hnenah damdawi pekchhuah tur a ni, a ti a. Pharmacist chuan damlo hnenah a țul anga Counselling pe in, damdawi ei dan tur dik leh damlo hriat tur pawimawh te a hrilh hre thin tur a ni. Tin, Pharmacy te chuan ruih nana hman theih damdawi reng reng fimkhur taka an hralh a ngai a, an hralhna Cash memo copy leh Register an vawng tha tlat tur a ni bawk. Damdawi dawr te hi a țul anga endik chhunzawm tur a ni.
