ICT Minister Dr. Vanlalthlana’n Goa-a neih 18th Digital Transformation Conclave Khualzahawm niin a hmanpui
Information & Communication Technology Minister Dr. Vanlalthlana chuan Zirtawpni khan 18th Edition of Digital Transformation Conclave, Taj Cidade De Goa-a neih chu Khualzahawm niin a hmanpui a. He hunah hian Pu Rohan Khaunte, Minister of Tourism, IT, E&C and Printing & Stationery, Govt. of Goa chu Khuallian a ni. Dr. Vanlalthlana chuan Digital India Mission-in kawng hrang hranga hmasawnna a thlen thu leh digital technology te’n ram chhung hmun tin a dap chhuah thu sawiin, Mizoramah ngei pawh digital movement chuan nasa taka hma a sawn thu leh harsatna hrang hrangte paltlangin tangkai taka mipui rawngbawl hna a thawh mek thu a sawi a. Digital infrastructure tih changtlun chhoh mek zel a nih thu sawiin, Mizo Fiber Grid Network project, BharatNet Phase-III project hnuaiah internet chak zawk buaipui a nih thu leh 4G Saturation project hmanga 4G tihchak leh 5G service state puma kalpui tura inruahman a nih thute, fibre pawh luh harsatna hmunah satellite kaltlanga internet pek vek tuma tanlak a nih thute, e-Governance state ni tura tanlak a nih thu leh Secretariat pumpui e-Office ah siam niin CM leh Cabinet Minister-te tiamin hmangtu 700 an awm mek thute a sawi a. Heng bakah hian e-RAM, Online OPD, Deaths & Births registration, MPSC Online platform, Vantlang Viltu (Citizen’s Eye App), Online Bill payment, KAI App, Leak Apps leh Mipui Aw-te tarlangin hman tangkai an nih dante a sawi bawk.
ICT Minister chuan inbiakpawhna tha chhawp chhuah chu hmasawnna tluantling leh huapzo nei tura lungphum pawimawh tak a nih thu sawiin, Mizoram chuan Industry 4.0 hmanrua hmang tura hma a lak thu leh IoT leh GIS Solution a hman thute, digital literacy program ngaihpawimawh niin Microsoft nena tangdunin thalaite Artificial Intelligence chungchang zirtirna kalpui tum a nih thute, Bhasini hnuaiah Mizo leh tualto tawng dangte digital platform-ah dah chhoh mek zel a nih thute, Mizoram Startup Mission hmanga digital enterpreneur chawilar a nih thute a tarlang a. Mizoram chuan Digital India siam tura hmalakna a thlawp tlat thu leh digital technology lama hmasawn tura theihtawp chhuah a tum thu sawiin, State dang, technology company leh innovator-te thawhpui a inpeih reng thu a sawi a. Kalkhawmte chu huapzo, chak leh hmalam hun atana inpeih reng Digital India leh ram intodelh, mahni kut kea ding thei – Vikshit Bharat @2047 – siam tura theihtawp chhuahpuiah a sawm nghal bawk a ni.
18th Digital Transformation Conclave-ah hian thupui atan ‘Digital India to Viksit Bharat: Transforming Governance with AI & Emerging Tech’ tih chu hman a ni a. Mipui nawlpuiin digital technology chhawr tangkaia hma an sawn theih dan tur chungchang Sawrkar, IT company leh academia-te’n sawi hovin thawh ho dan turte an ngaihtuah a ni.18th Digital Transformation Conclave hi session hnih, a khuhhawnna leh sawi hona huna then a ni a. ICT Minister Dr. Vanlalthlana hian session pahnih inkarah hian Sawrkar laipui hnuaia hna thawkte leh corporate leh company hrang hrangte kawmin hun a hmang a. Mizoram Sawrkar nena eGovernance kaihhnawiha thawhho theih dan tur kawng hrang hrangte a sawipui a ni. Dr. Vanlalthlana hi Pu Amit Sharma, Secretary, ICT Department, Govt. of Mizoram chuan a tawiawm a ni.
