UD&PA Minister Pu K. Sapdanga’n Lungleia UD&PA hnuaia bawlhhlawh sawngbawlna tur sak mek a tlawh
August ni 16, 2025 (Inrinni) khan Mizoram sawrkara Home, UD&PA leh DP&AR Minister Pu K. Sapdanga chuan Lunglei Pukpuia UD&PA hnuaia Lunglei khawpui bawlhhlawh sawngbawlna tur, Solid Waste Management Centre sak mek tlawhin, a dinhmun leh hma lak zel dan turte a enfiah. UD&PA Minister Pu K. Sapdanga hi a nupui Pi Darkhumi, Lunglei HPC Vice Chairman Pu V. Malsawmtluanga, Lunglei South bialtu MLA Pu Lalramliana Papuia, Lunglei West bialtu MLA Pu T. Lalhlimpuia, LMC Chairman Pu Lalzuithanga leh councillor-te, UD&PA Secretary Pu Lalmalsawma Pachuau, District Bawrhsap Pi Navneet Mann leh official dangte’n an ṭawiawm a.
Solid Waste Management Centre sak hna kal mek a endik bakah, MLA-te, LMC hotute leh UD&PA hotute nen Lunglei khawpui hmasawnna atana mamawh hrang hrangte an sawi ho nghal. Solid Waste Management Centre, Pukpui sak hna kalpui mekah, a panna kawng (approach road) laih zawh tawh niin, a hranga bawlhhlawh ṭawih thei sawngbawlna tur leh ṭawih thei lo sawngbawlna tur (wet & dry waste) building sak hna thawh mek a ni a. Tun dinhmunah 40% vel thawh zawh tawh a ni. Project hi Swachh Bharat Mission (Urban) 2.0 leh ringfenced fund aṭanga thawh niin, cheng nuai 385.6 project cost-in LHM Infra te’n an thawk a ni.
UD&PA Minister hian Serkawna Lena Stadium bula UD&PA ram hman ṭangkai theih dan tur pawh a en nghal a. Lunglei Chanmari veng chhunga War Memorial leh Lunglei Park pawh tlawhin, LMC hotute leh official-te nen a chei ṭhat theih dan tur te an sawi ho bawk.
