Lesde department hnuaia skill development training chhuakte certificate hlanna hun hmang
Vawiin khan Mizoram Building & Other Construction Workers Welfare Board member-te tana LESDE Department-in a buatsaih Skill Development Training chhuakte hnena certificate hlanna hun chu LESDE conference Hall-ah hman a ni a. Pu John Tanpuia, Director, LESDE Department chuan zirchhuak mi 45-te hnenah certificate a hlan a. Vawiina zirchhuakte chu General duty assistant course-ah (Healthcare Sector) Mission Foundation Movement (MFM) hnuaia Skill Development Program kaltlangin athlawnin training pek an ni.
Pu John Tanpuia chuan zirchhuakte chu healthcare lama thawk tur an nih angin, rawngbawlna rilru pu turin a chah a. Khawvelah skilled worker mamawhna a sang zela, Mizoram pawh skill development training lamah kan harhchhuak mek a, District hrang hrang ITI-ahte thiamthil zir kan in tihhmuh zel a ni a ti a. Sawrkar pawhin thiamthil zirna kawngah theihtawp a chhuah thu leh, India ram piah lamah foreign placement thlengin changtlung zawka hma a lak mek thu a sawi bawk a. Pu John Tanpuia chuan labour law siamthat mek a nih thu leh labour reform-na tur point 12 chu session leha sawiho tura peih fel tawh a nih thu a tarlang a ni.
Tun tuma zirchhuak mi 45 zingah mi 14-in private hospital leh home-based caregiver hna an thawk mek tawh a, Japan-a kal turin mi 5-in tawng an zir mek a, Singapore-a kal turin mi 8 an inbuatsaih mek bawk.MFM hnuaia Skill Development program kaltlangin mi 12,554 hnenah thiamthil zirtirna pek tawh niin, mi 7,342 chu hna hmuhsak an ni tawh a. Healthcare sector bikah GDA leh Geriatric care-giver mi 1500 train chhuah tawh an ni a, heng zingah hian Japan-ah mi 28 hnathawk turin an kal tawh a, Singapore leh Macau-a kal mi 100 chuang an awm tawh a, private hospital hrang hrangah mi 200 vel an thawk mek a, home-based a thawk mi 250 chuang an awm bawk a ni.LESDE hian Construction Welfare Board member-te tan course chi hrang hrang – healthcare, construction, apparel, food processing leh adangahte athlawnin Skill Development Training hi empanel training provider-te kaltlangin a kalpui mek a ni.
