Pu KK Pathak Task Force Member on Deregulation hovin Dan khirh hluihlawn chungchang sawiho
Nimin chawhnu khan Pu K.K. Pathak, Special Secretary, Cabinet Secretariat leh Task Force Member on Deregulation hovin Secretariat Conference Hall, MINECO-ah review meeting neih a ni a. Chief Secretary Pu Khilli Ram Meena kaihhruai meeting-ah hian state-in deregulation a kalpui mek chungchang thlirho a ni a, phurrit tihziaawmna lam hawia state sawrkarin dan hrang hrang, abikin sumdawnna lam hawia a lo zam te siam that dan tur chungchang pawh sawiho a ni.
Meeting-ah hian Dr. Lalzirmawia Chhangte, Commissioner & Secretary, Commerce & Industries chuan dan leh dun, hman zel rem lo, khua leh tui te tana hun khawhralna leh harsatna thlen thin ang te aw awm em, a awm chuan paih tura Central Sawrkarin hriattir a rawn pek ang te bawh zui a ni em tih chungchangah report a pe a. Hemi hnua sawihona neihah hian department hrang hrangte’n sumdawnna awlsam zawka kalpui theihna tura dan tul lo siamte an tihbo theih dan tur chungchang an sawiho a ni. Sawihona hunah hian tuna hmun hran hrana clearance neuh neuh ngai te leh permit kalpui dan rei tak te hian sumdawnna thar bul tanna tur a tikhawtlai thei a, siam that tur emaw hlui hlawn tur te pawh enge maw zah chu a awm dawn tih tarlan a ni.
Pu KK Pathak, Task Force Member chuan department hrang hrang hotute chu an department theuhah hetiang mipuite tana thiltih awlsamna tur leh sumdawngte leh thil siamna din turte tana approval leh clearance awlsam zawk leh rang zawka tihfel a nih theih nana hmala zel turin a fuih a ni. He meeting pawimawh takah hian Secretary leh Official te an tel tha hle.
