Hlawhtlinna hi hlawhchhamna atangin pen khata hlaah chiah a awm- Minister Prof Lalnilawm’n Mamit a zirlai titha chawimawina hun a hmanpui

Vawiin khan Chhimveng YMA Hall, Mamit-ah MZP Headquarters Mamit hmalaknain zirlai titha te chawimawina hun hman a ni a Prof Lalnilawma,Minister of State chu Khual lian niin hun a hmanpui. Vawiin hunah hian Mamit atanga Class 10 leh 12 distinction a pass mi 14, Institution topper mi 2, MES tling mi 3 leh MBBS graduate mi 1  te hnenah chawimawina hlan a ni a, Best School Award hlanna hun hman a ni bawk.

Khual lian chuan vawiin hun a lo kal te hnenah lawmthu sawiin MZP Headquarters Mamit in zirlai titha te chawimawi nachang a hria chu lawmawm a tih thu a sawi a. Minister chuan mi hlawhtling ni tur a pawimawh chu kan duhthlanna(choice) uluk hi a ni a, hei hian nghawng( consequence) thui tak neiin kan hun kal zel tur leh awm dan zel tur a hril a ni a ti a. Hlawhtlinna hi awlsam taka neih theih a ni lo a, theihtawp leh taima taka thawh a hlawhchhuah tur a ni a ti bawk.

Prof Lalnilawma chuan mahni inrintawkna leh kan rilru put dan hian kan nun nasa takin a hruai theih avangin zirlaite chu kan thil thlir dan(attitude) chu a eng zawng thlir turin a fuih a, lehkha chhiar tam turin a ngen nghal bawk. Harsatna tam tak kan nunah kan hmachhawn chho zel dawn a, hlawhtlinna hi hlawhchhamna atangin pen khatah chiah a awm a, hemi avang hian hlawhchham lo a taimakna nen bei chho zel turin a fuih bawk a ni.  Vawiin hunah hian Pi Carolyn LB Khiangte, Addl DC Mamit chu Khual zahawm niin zirlaite te tan fuihna thu a sawi a, Pu K Lalnunfela, DEO/DPC Mamit chu Khual tha niin Pu H Lalthianghlima, President,MZP General Headquarter chu Uaptu a ni bawk.  Vawiin zirlai titha  chawimawina hun hi Pu Lalkroshlua, Vice President, MZP chuan kaihruai a ,zirlai kalkhawmte zingah ruihhlo do tul dan inzirtirna neih a ni bawk.