Lunglei District Bawrhsap Pi Navneet Mann chuan Lungsen Aspirational Block huam chhunga Project BLOOM kalpui tur a hawng

Lunglei District Deputy Commissioner (Bawrhsap) hma laknaa Lungsen Aspirational Block huam chhunga nu leh naupangte hriselna leh chawi kanna kawnga beihpui thlakna tur, Project BLOOM (Beter Living through Outreach, Optimal Maternal & Child Health) kalpui tur chu vawiin khan Lungsen Primary Health Centre (PHC)-ah District Bawrhsap Pi Navneet Mann chuan a hawng.

Bawrhsap Pi Navneet Mann chuan Project BLOOM chu a hminga programme ruahman satliah mai ni lovin, nu, naupang leh chhungkaw tin hriselna leh chawi kanna tura thutiam a ni, a ti a. Lungsen Aspirational Block huam chhunga nu leh naupang hriselna kawnga harsatna hrang hrang awmte chu Project BLOOM kal tlanga chin fel theih a nih a beisei thu sawiin, project hlawhtlin nan department hrang hrang leh khawtlang hruaitute leh mipuite nen thawh hona ṭha tak neih a pawimawh thu a sawi a. Block hnufual nihna aṭanga chhuak a, kawng tinrenga hma sawn turin sawrkar department hrang hrang kal tlanga hma lakna awmte chu theih tawp chhuaha ṭawiawm turin Lungsen block mipuite chu a sawm a ni.

He hun hi Lungsen Block Development Officer (BDO) Pu Lalhruailiana Zote chuan kaihruaiin, inlawmna thu a sawi a. District Bawrhsap hma laknaa Project BLOOM kalpui tur chu Lungsen block tana hma lakna lawmawm tak a nih thu sawiin, mipuite chu project hma lakna ṭha taka ṭawiawm turin a sawm a. Tun hnaia Lungsen Primary Health Centre-in damdawi in ṭha tehna, NQAS (National Quality Assurance Standards)-ah certification an hmu thar chu an chhuangin, an lawmpui hle tih tar langin, Lungsen block hma sawnna kawnga mel lung pawimawh tak a nih thu a sawi.

He hunah hian Lungsen PHC-a Medical Officer Dr Lalremruati leh Lungsen Child Development Project Officer Pu Vanlalsanga te chuan Project BLOOM kalpui dan tur leh mipuite tana hriat tur pawimawh hrang hrang an sawi a. Additional Deputy Commissioner Pi Rochuangkimi Khenglawt chuan lawm thu sawiin hun a khar a ni.