Sports minister in republic veng yma day leh cyma football tournament champion lawmna hmanpui

Republic Veng Branch YMA chuan vawiin khan LBS Suzuki 22nd Inter Branch YMA Football 2025 champion leh YMA Day lawmna an nei a, khuallian Pu Lalnghinglova Hmar, Minister of State, Sports & Youth Services Department chuan football chu mi zawng zawng tan eizawnna a nih loh thu a sawi.

Champion lawmna hi Republic Veng Community Hall-ah neih a ni a, bialtu MLA C. Lalsawivunga leh MP (Rajya Sabha) K. Vanlalvena te sial thawh hmangin ruaipui nen champion lawmna hi an hmang. Republic Veng MC&DC ten champion hlado in lawmna bul an ṭan a ni. Republic Veng hian kum 2005 khan CYMA Football-ah an champion tawh a, kum 20 hnuah coach Lalsangzuala Hmar hoin nomawi an chawi leh a ni.

Khuallian leh Sports Minister Pu Lalnghinglova Hmar chuan Republic Veng champion a lawmpui a, an thawhrimna a fak hnuin, “Mizo player-ten ISL season hmasa khan minute an nei tam ber a, I League-ah phei chuan an tam fal hle. Chutihrualin football hi mi zawng zawng eizawnna tur a ni lo. Talent nei tha zawng zawng an thleng sang chuang lo a, vanneih tel a ngai. Lehkha thiam hi eizawnna chu a ni,” tiin a sawi a, zirna leh infiamna kaihkawp thiam a pawimawh thu a sawi tel bawk.

Excise & Narcotics Minister ni bawk Tetea Hmar chuan sawi chhunzawmin, “Dam rei zawngah thu kan nei lo a, kan dam tawi zawng chu kan thiam loh a ni ve bawk. Zu in nasat lutuk avang te, inchiu avang te, kan khawsak phung dik tawk lo avang te, zuk leh hmuam avangtein Mizo kan thi nasa lutuk, kan harh thar a ngai.

“A bik takin mipa te kan dam rei a ngai. Mipa kan thi nasa a, hmeithai an tam zel. Mizo kan awm zel theih nan chuan kan dam rei a, kan pian pun a ngai. Tun ang zela kan kal chuan a zuih zawngin kan kal a, he hnam hi a awm zel theih nan chuan kan pian pun a ngai,” tiin kal khawmte a chah.

Republic Veng Branch YMA hian zirlai ti tha chawimawina a nei nghal a, khuallian chu Sports Minister Lalnghinglova Hmar niin MP (Rajya Sabha) K. Vanlalvena chu uaptu a ni a; Agriculture minister P.C Vanlalruata, Ward No. XVII Corporator David Zohmangaiha bakah Central YMA hruaitute an tel bawk.

Agriculture minister P.C Vanlalruata chuan, “Social media leh tunlai thiamna pung zel vangin khawsak phung a danglam chho a, hetianga hun inthlak vel hi Mizoten an paltlang thei a nih chuan YMA a vul zel ang,” tiin a sawi a, thalaite chu chhiatni thatniah tlawmngaihna vawng nung zel turin a chah bakah nu leh pate pawh an fate chu mitthi lumenna lama tir ngam turin a chah bawk a ni.

Uaptu Rajya Sabha MP K. Vanlalvena chuan, “Hlawhtling tur chuan thawhrimna a pawimawh a, Republic Veng team-in thawhrim rah in seng. Infiamna ni loah pawh hlawhtling tur chuan thawhrimna hi a pawimawh ber a ni,” tiin a sawi.

Ward No. XVII Corporator David Zohmangaiha chuan, “Republic Veng chhehvelah infiamna hmun hrang hrang a awm a, kan vengah ngei pawh hian thil tha dahna turin hmun tha kan la nei. Kan ram hruaitute hian min hriatpui se a lawmawm hle ang,” tiin Republic Vengah hmasawnna tur a la awm thu a sawi.

CYMA president Lalhmachhuana chuan, “Branch YMA a chak chuan vengchhung an inlungrual thin. Republic Vengah pawh Branch YMA chak a, hemi zarah hian CYMA Football-ah in champion a ni,” tiin Branch YMA pawimawhna a sawi a lang.

CYMA leh MFA chuan kumin May thla chhung khan CYMA Football 2025 an buatsaih a, team 154 an tel. Republic Veng hian champion turin Zemabawk East (16-0), Chanmari (2-0), Samlukhai (6-0), Khawzawl Zuchhip (5-0), Khawzawl Vengthar (1-0), Sialhawk (2-2, Pen 5-4), Durtlang (3-2, aet) leh Bethlehem Vengthlang (1-1, Pen 6-5) te an hneh a. Republic Veng captain Lalnunzira chu best player-a thlan a ni a, goalkeeper RS Lallawmzuala chu best goalkeeper atan thlan a ni bawk.