World Environment Day pualin hun hmang dawn
World Environment Day chu naktuk June ni 5 hian khawvel hmun dangte rualin Mizoram pumah “Beat Plastic Pollution” tih thupui hmangin hman a ni dawn. World Environment Day kumina thupui hi kum kalta a plastic in khawvel a tih buai nasat vanga Plastic atanga khawvel chhan chhuah na lam hawi a ni dawn a, Aizawl Divisional Forest Officer Pu Lalnunsanga Khawlhring chuan Akashvani palai nen an inkawmna ah Mizoram ah environment tha tak a awm thu leh boruak thianghlim bakah, khawlum lutuk leh te khaw vawt lutuk te chu Mizorama chengte chuan an la tuar lo a ti a, hei Mizoram vanneihna ani tih sawiin humhalh uar a pawimawh thu a sawi.
Pu Lalnunsanga Khawlhring chuan tunhnaiah Mizoram ramngaw hrang hrang a chereu tih sawiin ramsa leh nungcha tam tak pawh an chereu mek a ti a, humhalh an ngai takzet tih sawiin sik leh sa inthlak danah ramngaw humhalh loh chu tuar thei anni tih sawiin mipuite tanrual a pawimawh a ti a, sik leh sa inthlakah natna pung thei a tam phah tih sawiin heng laka him theihna tur chu ramngaw leh nungcha humhalha tih chereu loh ani tih a sawi. Pu Lalnunsanga Khawlhring chuan khuarel thil inthlak chu tlansan theih a ni lo ati a, ram pakhat tana hlauhawm bik nilo in, khawvel ram zawng zawng in environment inthlak chu an tuar thin a ti a, Mizoram ah tuilian tak emaw hmun danga nasa taka a thawh ang tuar lo mahse heng hun awmdan inthlak in natna a ken tel chu tuar thei an ni a ti a, invenna tha tak an neihloh avangin eizawnna leh mihring hriselna nghawng thei a tam avangin ramngaw humhalh chu tih makmawh a ni tih a sawi.
Aizawl Divisional Forest Officer chuan Mizoram ah July 2022 atangin hman khat daih plastic hman khap ani tawh a ti aa, duh ang in hma a sawn lo tih sawiin hei hian chhiatna tam zawk a thlen thei a ti a, thingphun lam uar deuh tur leh mi tin te khuarel in a ken tel ngaina tura chah in Mizoram boruak thianghlim tak chu ngaihhlut a pawimawh thu a sawi a ni.
