Vanghmun-ah Cultural Meet neih a ni
Vawiin khan Art & Culture Department leh Tripura Group YMA te tangkawp buatsaihin Vanghmun, Jampui tlangdung-ah Cultural Meet neih a ni a. Pu C. Lalsawivunga, Minister, Art & Culture Department chuan khuallian niin a hman pui a; he Cultural Meet-ah hian Tripura Group YMA huam chhunga YMA Branch hrang hrang te an tel.Vanghmun Khelmual, Jampui Hill, North Tripura a Cultural Meet neih hi Pu Chawnghmingthanga, Vice President, Tripura Group YMA chuan a kaihruai a; Pu Lalnunfima, President, Tripura Group YMA chuan lawmthu sawiin hun a hmang bawk.
Khuallian Pu C. Lalsawivunga chuan thu sawiin ram hrang hrangah awmin inrelbawlna ramriin min kardan mahse insuikhawmna rilru pu chunga thinlunga inpumkhat zel tur leh Mizo nun zemawi vawnghima aia upa zah kawnga tan la zel turin kalkhawm te a fuih a ni.
Cultural Meet-ah hian heng YMA Branch : Vanghmun, Hmunpui, Vaisam, Phuldungsei, Hmawngchuan, Sabual, Bangla Zion, Behliangchhip, Tlangsang leh Tlaksih te an tel a, Mizo hnam lam chi hrang hrang entir niin zai mawi tak tak ngaihthlak a ni bawk. Tripura Group YMA huam chhungah hian YMA Branch 19 an awm a, YMA member 3000 bawr vel an awm a ni.Cultural Meet-ah hian Art & Culture Department atangin Pu F. Lalthanmawia, Joint Director leh Documentation incharge Pu Lalchhandama te an kal a. Cultural Meet hi Jampui tlangdunga Zofate’n an hlut hle a ni.
