Union minister of state for education-in pm shri school leh museum a tlawh
Vawiin khan Union Minister of State for Skill Development & Entrepreneurship and Education, Pu Jayant Chaudhary te nupa chuan Chanmari, Aizawl-a PM Shri Govt. Model English Primary School, Chanmari an tlawh. Union Minister hi classroom-ah te lut kualin naupangte nena inbiakna hun te a hmang a. Classroom-ah hian naupang thenkhat bulah te thuin an sikul chanchin te a zawt a, zirtirtute pawh an thawh dan thenkhat a zawt bawk. Ei siamna hmun te a fangkual a, chaw chhumtute nen pawh an inkawmin an eisiam dan te a zawtin an thawk tha nia a hriat thu a sawi a ni.
Union Minister hian PM Shri Govt Model English Primary School a tlawh hnu hian Mizoram State Museum, Zarkawt pawh a tlawh nghal a. Mizo nunphung leh khawsak dan hriat theih nana thil pawimawh chi hrang hrang vawn thatte chu a en kualin a hlu a tih thu a sawi bawk a ni. Union Minister te nupa hian School leh Museum an tlawh hnuah hian vawiin chawhnu khan Lengpui Airport atangin New Delhi an pan a ni.
Union Minister- te nupain PM Shri Govt Model English Primary School leh Museum an tlawhnaah hian School Education Minister Dr. Vanlalthlana te nupa, School Education Special Secretary Pu David Lalthantluanga, Addl Director Pu Lalhmachhuana, Samagra Shikhsa State Project Director Pu C.Lalthanzira leh officer dangten an tawiawm a, School leh Museum-ah te hian Union Minister te nupa hi thawktuten an lo dawngsawng a ni.
