UD&PA MINISTER HOVIN BAWNGKAWN – DURTLANG KAWNG CHEI DAN TUR ENHO
Tukin khan Urban Development & Poverty Alleviation Department Minister Pu K. Sapdanga hovin SASCI Part-XIII (Urban Planning Reforms) hnuaia hna thawh tur “Construction of Complete Street Design” (Bawngkawn leh Durtlang Leitan inkar kawng chei) chu en ho a ni.Minister hi Pu Lalmalsawma Pachuau Secretary, UD&PA Department leh UD&PA department hnuaia officers hrang hrang te, AMC aiawh te Durtlang leitan Local Council, Bawngkawn Local Council, Bawngkawn west Local council hruaitute leh Project Design siamtu SEeDS Architectural Consultancy Services ten an tawiawm a ni.
Site Visit hi Bawngkawn Junction atanga tanin Durtlang leitan thleng neih ani a. Hemi hun chhung hian Project Design siamtu Pu Lalruatkima Hauhnar, Principal Architecture, SEeDS Architectural Consultancy Services chuan an design sawifiahna te leh poster presentation te a neihpui nghal a ni.UD&PA Minister chuan he Project hi kawngpui tih zauhna tur a ni lova, a awmsa tangkai taka hman leh cheimawina tur chauh a nih thu a sawi a, hnathawh na tur sum pawh sanction vek nih tawh thu leh hna tawh tan thuai theih a rin thu a sawi bawk.
Hna tluang taka thawh a nih theih nan kawngpui hnaih a awm te chu tha taka indawrna neihpui a, kawngpui area chin chu lo kian ngei tura a beisei thu a sawi a, chutihrual chuan kian duhlo lui tlat an awm a nih chuan dan kenkawh te pawh a ngaih tur thu a sawi. He Project rual hian Leitan lian leh Synod Hospital bul, Leitan te inkar pawh karleh atanga Motor kal theih tura siam anih tur thu a sawi bawk.Pu Lalmalsawma Pachuau Secretary, UD&PA Department chuan he Project atan hian Crore 15 sanction a nih thu leh tender pawh chhuah mek ani a thu a sawi. Project design hi Architectural competition hmanga thlan a nih thu leh a endik tu atan pawh Architect hran hrangte, MZU leh PWD lam an Chief Architect te an tel thu a sawi bawk. A final design hi UD&PA Minister leh Project huam chhunga Local Council te leh Bialtu Corporator te hovin, Public consultation nei chunga pawm a nih thu a sawi.
