Tourism Minister leh Champhai Nature Conservancy hotute Hnahsin Kut chungchangah inkawm
Tukin khan Pu Lalnghinglova Hmar, Minister of State, Tourism Department leh Champhai Nature Conservancy (CNC) te chu Circuit House, Champhai ah an inkawm a, CNC-in a ngen angin Hnahsin Kut kal zel dan tura sawrkar leh CNC thawhho dan tur chungchang an sawiho.Tourism Minister Pu Lalnghinglova Hmar chuan Hnahsin Kut buatsaihtu Champhai Nature Conservancy leh an thawhpuite chungah lawmthu a sawi a. “Mizorama festival lian ber pakhat in buatsaih thei hi a lawmawm hle a, tun aia lian leh zau zawka kalpui theih niin a lang; in mamawhnaah chuan sawrkar pawhin theihtawp kan chhuahpui zel ang che u,” a ti a; tourism ṭhang zel chu mitin khawih thil a nih angin kohhran leh khawtlang hruaitute nen inlungrual taka kalkawp thiam a ṭul thu a sawi. Minister chuan kût tihhmasawnna’na rawtna a neihte tarlangin, Hnahsin Kut vanga Champhai tlawhtu tourist-te chu Champhai District chhung hmun danga Mizo hmun pawimawh leh mawite kawhhmuh leh tlawhna hun siamsak tha a tih thu a sawi a, “Champhai District hi pi pute hmun pawimawh tamna a nih bakah hmun mawi leh nuam tlawh tur a tam a, khualzinte zin chhuah zui zel dan ngaihtuah hi a ṭul hle a ni,” tiin Hnahsin Kut hmanna piah lama zin chhuah dan duan a duh thu a sawi.
Champhai Nature Conservancy President Dr. Sammy Laldinthara pawhin thu sawiin, sawrkar – a bikin Tourism Minister leh Tourism Department-te phurpuina leh support vangin lawmthu a sawi a. Hnahsin Kut chu beisei phak baka a len chhoh zel avangin a buatsaih leh funding kaihhnawihah harsatna a awm thei a, a hautakin a buatsaihna kawngah hun a duh em em bawk a, chuvangin sawrkar nen thawhdunna mumal zawk neih tul an tih thu a sawi. Dr Sammy chuan Hnahsin Kut chu ‘event-based’ festival ni lova hnahsin pangpar leh Champhai district mawina behchhan zawk turin herrem theih chu an duh dan a nih thu a sawi a; Tourism Department-in tun hnaia khawtlang nen ṭang kawpa (community based tourism) hma an lakna chu an duhthusam a nih thu a sawi.
Champhai Nature Conservancy rawtna angin, Hnahsin Kut buatsaih kawngah mumal zawka sawrkar nen thawhho nise tiin meeting chuan a rel a. Kalphung awm sa tidanglam lutuk si loa thawhho dan tur chipchiar zawk chu Tourism department hotute leh CNC te’n February 2026 ral hma ngeiin sawiho leh nise, tih a rel a ni bawk. Tourism Minister hi Pi R. Lalrodingi, Director, Tourism Department leh Pu K. Lalruatsanga, AE, Tourism te’n an tawiawm a. Tourism Director hian sawrkar nen thawhhona tura tihtur tul pawimawh hrang hrangte a sawifiah a, funding source awm theite leh a bawhzui dan turte sawiin theihtawp chhuah an tum tur thu a sawi.
