Tlabung RD Block-ah “Ni Khat Atan SDO(C)/BDO” tih buatsaih a ni
Nasha Mukt Bharat Abhiyaan hnuaia ruihhlo do beihpui peng khat atana Lunglei Deputy Commissioner (Bawrhsap) hma lakna kal zelah, vawiin khan Tlabung RD Block-ah hlawhtling takin “Ni Khat Atan SDO(C)/BDO (Be a SDO(C)/BDO for a Day)” tih hun buatsaih a ni a. Tlabung RD Block-a zirlai naupang paruk chu SDO(C)/BDO hna thawh dan a taka an hriatna tur leh mawhphurhna pawimawh la ngam tura fuih phurtu atan SDO(C)/BDO ṭhutthleng luahtir an ni.
Tlabung Block chhunga zirna kawnga ti ṭha leh entawn tlak zirlai paruk –Lalpekhlua Jongte (Class XI), Higher Secondary School, Tlabung; Vanlalruati (Class XI) leh Vanlalrinfeli (Class XII), Tlabung Senior Secondary School; Subhodip Majumdar (Class X), Govt High School, Tlabung; K. Lalnunpuii (Class X) leh Remtluangpuii (Class IX), Modern High School, Tlabung te chu he hunah hian an tel a. Zirlaite hi SDO(C) lirtheiin SDO(C) Office thleng hruai niin, Tlabung SDO(C)/BDO Pu Moses Lalfakawma Tlau leh thawktute’n an lo dawngsawng a. Office-a pindan hrang hrang an fan kualpui a ni. Vawiin hun hmanah hian zirlaite hi BDO hna thawh dan leh sawrkar hma lakna (scheme) hrang hrang – MGNREGA, Pradhan Mantri Awaas Yojana (Gramin), Mizoram State Rural Livelihood Mission, Swachh Bharat Mission, etc. te hrilhfiah an ni a. BDO ṭhutthlenga ṭhuin, mipuite mamawh leh harsatnate an ngaithla a, chhiatna thlen thulha hma lak dan leh block hmasawnna atana ruahmanna siam dan hrang hrangte a takin an ti chhin bawk.
Tlai lamah “Ni Khat Atan SDO(C)/BDO” hun hman aṭanga an thil zir chhuah leh tawn hriatte inhrilh tawnna hun buatsaih niin, SDO(C)/BDO Pu Moses Lalfakawma Tlau chuan Zirlai-BDO-te hnenah hian thuziak (certificate) a hlan a ni. Lunglei DC hma laknain “Ni khat atan Bawrhsap” (Be Deputy Commissioner for a Day) tih chu August ni 27, 2025 khan Lungleiah hlawhtling taka buatsaih a lo ni tawh a. He hma lakna hi DC ruahmannain block level-ah chhunzawm a ni.
