Thli leh ruah vangin Lunglei District-ah chhiatna leh harsatna hrang hrang a thlen belh, mihring thi leh hliam erawh an awm hriat a ni lo
Ni thum kalta aṭanga thlipui leh ruahpui thawk chuan Lunglei District chhung hmun hrang hrangah chhiatna a thlen belh zel a. Vawiin, June ni 1, 2025 (Pathianni) chawhnu dar 1:00 thleng khan Lunglei District Emergency Operation Centre (DEOC)/District Disaster Management Authority (DDMA) chuan chhiatna thleng report hrang hrang 66 a dawng tawh a. Lei min vanga chhiatna hmun 50 chuangah thlengin, thli vanga chhiatna hmun 8-ah leh tui lian vanga harsatna hmun 5-ah a thleng a. He’ng chhiatna hrang hrang hian khaw kar leh khaw chhung inkal pawhna tam tak tipingin, a theih ang angin then fai hna thawh nghal zel a ni a.
An chenna in dinhmun hlauhawma a din avangin hriat theih chinah chhungkaw 36 chu hmun him zawkah an inthiar chhuak tawh bawk. He’ng chhiatna avang hian mihring thi leh hliam erawh an awm hriat a ni lo. Nimin lam khan Rahsivengah Revenue Department ram minin a hnuaia kawng hnawhin, then fai hna thawh nghal a ni a. Phairuangkai lei helna (diversion road) chu tui lianin tichhiain, kal tlang theih a ni lo va. Khawmawiah Ngengpui lui leh Kawrawng lui lianin, chhungkaw 40/50 vel thlai a tichhia tih report dawn a ni a.
NH-302 Hauruang leh Pachang inkar kawngpui khi leh tla hniam awmin, bal mai hlauhawmin a awm bawk a. Nimin lama Bunghmuna lei min vangin chhungkaw 5 chu an chenna in aṭangin hmun him lamah an inthiar chhuak a, Bunghmun thlanmual minah thlan 18 a chhia tih report dawn a ni bawk.
