Thawhhona kawng dapin Pu Lalnghinglova Hmar leh Assam Tourism Minister inkawm
Pu Lalnghinglova Hmar, Tourism Minister chu vawiin khan Guwahati-ah Assam Tourism Minister Pu Ranjeet Kumar Dass nen an inkawm a, tourism hmasawnna tura thawho an rem ti a, hun remchang hmasaah thawhona thuthlung ziah an tum. Pu Lalnghinglova Hmar chuan Mizoramin tun hnaiah tourist a neih tam thu leh, heng khualzin zinga a tam ber hi Assam state atanga lo zin an nih avangin Assam sorkar nena tourism hmasawnna kawnga thawhona neih ṭul a tih thu a sawi chu Assam Tourism Minister hian ṭha a ti a, a official-te nen an sawiho nghal a ni.
Assam Tourism Minister Pu Ranjeet Kumar Dass chuan, “Mizoram hi kei ni tan state hrang a ni lo a, tun hmaa state pakhata chengho vek kan ni. Mizoram tlawh hi Assam mite hian an châk a, rel a awm tawh bawk nen mi ṭhahnem zawk an lo kal zel kan beisei,” a ti. Mizoram Tourism Minister chuan, “India rama state te leh mipui tlemna kan ni a, chutihlaiin khualzinin an tlawh duh leh ngainat state nih tuma inbuatsaih mek kan ni. He state hian a mamawh chu partner ṭha a ni a, hla taka mite nena thawhho aiin Assam nena thawhho hian tourism hmasawnna tura rah ṭha a chhuah kan ring tlat a ni,” a ti.
Pu Lalnghinglova Hmar chuan Assam Tourism hunpui buatsaihah Mizoram tourism chawi larna tur thlalak leh video-te a remchan anga tilar ve ṭhin tura ngenna a thlen chu tihhlawhtlin an tum tur thu an hrilh bawk.He inkawmnaa tel ve Kumar Padmapani Bora (IRS), Managing Director, Assam Tourism Development Corporation (ATDC) chuan Mizorama tour operator-te tan Guwahati lamah workshop an buatsaih theih thu te, Mizoramin ATDC kal tlanga tourism lama puih a ṭulnaah an inhawn reng thu a sawi.
