Synod inkhawmpui Mission Vengthlang kohhran biakinah tan a ni
Presbyterian kohhran thuneitu sang ber Synod inkhawmpui vawi 101-na chu nimin atanga khan Mission Vengthlang Kohhran biakinah neih tan a ni a, December ni 8 (Pathianni) thleng a awh ang. Vawiin rorel inkhawm tan hma hian Moderator kalchhuak Rev. R. Vanlalnghaka’n Moderator thar Rev. RC Lalnghakliana hnenah mawhphurhna pe in, rorel ni khatna hi tan a ni a. Inrinni thleng rorel inkhawm hi neih a ni a nga, zanah vantlang Pathian biak inkhawm neih thin a ni ang.
Synod Inkhawmpui hi kum 2010 atang khan Bial-in an thleng tan a, kumin hian Mission Vengthlang Bialin Mission Vengthlang Kohhranah an thleng a, Tun tumah hian general agenda 35 awmin, SEC/Boards atanga thu lut eng emaw zat a awm a, Synod Rorel hian December 7 (Inrinni) thleng a awh dawn a ni.
Kumin Synod Inkhawmpui Thlarau lam thupui chu ‘Lalpa kawng buatsaih’ a ni a, December 7 (Inrinni) zanah Rev. C. Sapkaia, Khatla-in thupui hi a sawi dawn a, December 8 (Pathianni) chawhma ah Pastor nemngheh leh Pro. Pastor ruat inkhawm a ni ang a. Chawhnu chu Lalpa Zanriah Sakramen inkhawm a ni ang a, zan Inkhawmah Moderator kalchhuak tur Rev R. Vanlalnghaka valedictory sermon ngaihthlak a ni bawk ang.
