Stockholm-a khawvel ram hrang hrangte intawhkhawmnaah India rama inthlan dan kalphung thatna ‘Electoral Integrity’ chungchang sawi a ni
Nimin tlai khan Sweden rama inthlan dan kalphung tha chungchang sawi hona ‘International Conference on Electoral Integrity’ neihah Chief Election Commisioner of India Gyanesh Kumar chuan thu a sawi a. Khawvel ram hrang hranga inthlanna buaipui thin tu pawl (Election Management Bodies) hrang hrangte thawm chak nana Election Commision of India (ECI) hnathawh hrang hrangte tarlangin, rinawmna leh dikna nena inthlannna neih hi kan ram nihna tarlangtu a ni a ti bawk. He intawhkhawmna hi International Institute for Democracy and Electoral Assistance (International IDEA) te buatsaih niin khawvel ram hrang hrang 50 chuang atangin Election Management Bodies (EMBs) aiawh palai mi 100 vel an tel a ni. Shri Gyanesh Kumar chuan kalkhawmte chu India rama ECI-in inthlanna hautak tham tak tak a kalpui dan te a hrilh bawk a, a bikin parliament member tur thlanna, political party hrang hrang te, candidate te, police leh mipuite bakah inthlan buaipui tu observer-te leh media mi chak tak tak te vilna hnuaia neih a nih dan te a sawi a. India ramah chuan Inthlanna hlawhtling taka nei tur chuan thawh hona tha tak a awm a ngaih thu a sawiin Inthlanna neih lai hian ECI chuan mi maktaduai 20 chuang, polling staff te, police te, observers leh party agent te chhawrin, khawvela pawl lian ber, khawvel ram thenkhat sawrkar inzawmkhawm ai pawha tam zawk thawktu a nei thin a, chuti chung chuan mipui tluklehdingawm khat velte chuan an duh ang takin vote an thlak thei thin a ni a ti.
Hei bakah hian kum eng emaw zat chhunga India rama inthlanna neih dan leh inlumleh chhoh dan te, India danpui vawng nung reng chunga tunlai mil zela inthlanna insiksawi chhoh dante a sawi bawk a. Kum 1951-52 inthlanah chuan electors mi maktaduai 173 an awm lain, kum 2024-ah chuan maktaduai 979 an tling tawh a, polling station pawh maktaduai 0.2 atangin 1.05 lai a awm tawh bawk a, hengte hian India ram hmasawnna tarlangin inthlanna pawh inrelbawlna tha tak hnuaia kalpui thin a nihzia a tarlang a ni. Kum 2024 inthlanpuiah khan political party hrang hrang 743 an awm a, national party 6 awmin state party 67 leh registered party dangte an awm thu a sawi a, India ram pumah candidate mi 20,271 awmin Elelctronic Voting Machine (EVMs) pawh maktaduai 6.2 lai hman a ni bawkte khan inthlanna felfai, huam kim leh ralmuang a awm theih nana Election Commission of India theihnate a a tarlang a ni a ti bawk. Shri Gyanesh kumar chuan, kum 1960 atang khan India chuan kum tinin electoral roll ennawn a nih dawn apiangin leh inthlan neih a nih dawn apiangtein Electoral Roll-a hming chuangte leh political party-te mipui hriat turin a tlangzarh thin a, sawisel duh an emaw, siam that ngaite a awm emaw, langtlang takin mipui hmuh theih turin tihchhuah thin a nih thu a sawi a, hetianga tihna hian rintawkna leh inthlanna hlawhtling tak a awm tir thin a ni a ti.
India rama inthlanna dan chu huapzo tak tura duan niin – mi, vawi khat vote thlakna tur an ni emaw, kum 85 chuang tawh pi tar leh pu tar an ni emaw, piangsual leh ramtuileilo an ni emaw, tuai leh patil an ni emaw, thingtlang kilkhawr khaw tlawhpawh that phak loh hmun amite an ni emaw, voter pakhat lek awmna Polling Booth atanga Polling station sang ber, Himachal Pradesh-a Tashigang amite an ni emaw, tumah thleibik lova inthlanna neih hi a tum a ni a, Inthlanna buatsaih ngawr ngawr hi kan tum ber ni lovin, voter tumah endawng bik nei lova inthlan hi kalpui thin ni se tih hi India danpui duh dan a ni a ti bawk. He hunah hian Shri Gyanesh Kumar chuan heng ram – Indonesia, Mongolia, South Africa, Switzerland, Moldova, Lithuania, Mauritius, Germany, Croatia, Ukraine leh United Kingdom atanag mi pawimawh lokalte hi inkawmna hun neihpuiin voter tam zawkin vote an thlak theih dan tur te, inthlanna kaihhnawih khawl (technology) chungchang te, ram pawna cheng khualehtui tena vote an thlak theih dan chungchang te, inthlan baupui tu pawl chak tak din chungchang te an sawi ho a ni.
