STATE TASK FORCE ON IMMUNIZATION THUKHAWM; KUM 2024-25 CHHUNGIN TARGET 5% IN KHUM
Natna hrileng inkaichhawn theih laka naupang leh nu naupai lai te invenna damdawi – vaccine lak chungchanga state pum huapa hma latu committee State Task Force on Immunization (STFI) chu an chairman Health Commissioner & Secretary Pu H. Lalengmawia hovin vawiin khan SAD Conference Hall, MINECO ah an thukhawm.
Vawiin meeting-ah hian state chhunga hri danna pek hna – Universal Immunization Programme (UIP) hmalakna thlirletna leh harsatna tawh leh hmachhawp te sawiho a ni na. Report atanga a lan dan in kum 2024-25 chhunga target 90% dah a nih lain 95% pek a ni a. District ang chuan Siaha, Kolasib leh Lawngtlai ten 90% an la tlin lo thung a ni. Vaccine la lo ten an lak loh chhan hrang hrang zingah vaccine pawimawhna hriat chian tawkloh avang te, vaccine lak tirh a khawsik, etc. a awm thei thin avanga hreh phah te, injection nawn ngaih avanga lak hreh avang te, social media lama intihthaihna avang te, thawktu indaihlohna leh hnathawh kalpawhna that tawkloh avang leh chhan dang hrang hrang avang te a tel a ni.
Pu H. Lalengmawia chuan state in a target a khum chu lawmawm viau mahse hmasawn kan ngaihna lai chu sukiang tura ngawrh zawka hmalak a tul thu leh awmze nei taka hmalak dan tur pawh duang turin member te a sawm a. Dr. Lily Chhakchhuak, Mission Director, National Health Mission Mizoram chuan Universal Immunization Programme hnuaiah natna chi hrang 11 laka hri danna pek a nih thu leh, state dangah chuan natna hri 12 huam mahse Mizoram bikah chuan Japanese Encephalitis natna hri a len ve loh avanga telh a ni loh thu a sawi. Dr. Malsawmtluangi Ralte, Dy. Director (EPI), Directorate of Health Services chuan presentation pe in, natna hri Measles-Rubella bikah chuan Mizoram chu hri danna pek kawnga a tih that thu a sawi a. Hospital pali (Aizawl Civil Hospital, Zoram Medical College, Sub-Divisional Hospital Kulikawn leh Integrated AYUSH Hospital) record atanga a lan dan in kum 2023 khan case 15 awmin, kum 2024 ah case 34 ah a chho a. Kumin kum 2025 (June thla thleng khan) case 2 chauh hmuhchhuah a la ni thung.Vawiin State Task Force on Immunization (STFI) meeting-ah hian Health and Famui Welfare Department hnuaia official-te bakah School Education Department, I&PR Department, leh tlawmngai pawl atang te in an tel a ni.
