STATE LEVEL CHILDREN’S SCIENCE CONGRESS-2025 ZAWH FEL A NI
Vawiin khan Ni 2 chhung awh State Level Children’s Science Congress vawi 33 na chu zawh fel a ni a. Science Teachers Association Mizoram leh Samagra Shiksha Mizoram ten an buatsaih Science inkhawmpuiah hian child scientist ten an zirbing na Science project 47 presentation an pe a ni. Science Congress-ah hian thupuiah “Science for Sustainable Development and Community Well- being” tih hman a ni a.
School Education Department Directorate Conference hall-a Science inkhawmpui neihah hian Pachhunga University College a zirtirtute -Dr. Lalrinthara Pachuau, Dr. K. Vanlaldinpuia leh Dr. Albana L. Chawngthu ten Science project te an endik a ni.Pu C. Lalthanzira, State Project Director, Samagra Shiksha chuan Science inkhawmpui hi a hmanpui a. Thusawiin child scientist te an vanneih thu hrilhin heng an remchanna an neihte hi zirna kawnga hmasawn nan hmang turin a chah a, heng science activities a an telna hian inrintawkna a pe tih sawiin tel zel tur in a chah a. Tunlai hunah chhel a pawimawh tih sawiin zirlaite chu rilru paukhauh nei turin a fuih a, zirlaite rilru hrisel nan life skill zirtir turin guide teacher te a chah bawk.
Vawiin tlaia Science Inkhawmpui kharna hi Dr. R. Lalengmawia, STAM President in a kaihruai a, STAM dintirh atanga ngaihpawimawh ber chu science leh mathematics zirna tih hmasawn a nih thu a sawi. Children Science Congress State Academic Committee Secretary Tv. Emmanuel Vanlalhriatpuia’n report a pe a, District 11 atangin Science project 47 pho chhuah a ni a, child scientist mipa 36 leh hmeichhia 54 an tel a ni. Pu Zothanliana, General Secretary, in STAM hmalakna report pe in lawmthu a sawi a, he science inkhawmpui hi a tiak a ni.
