Sports minister leh pullela gopichand leh tata trusts hotute inkawm
Vawiin khan Pu Lalnghinglova Hmar, Minister of State, Sports & Youth Services chuan MINECO-a a office chamber-ah Pullela Gopichand Badminton Academy dintu leh Badminton National Chief Coach ni bawk Pu Pullela Gopichand bakah Pi Neelam Babardesai, Head of Sports, Tata Trusts leh Pu Sajith John, Sr. Consultant, Tata Trusts (NEIDA) te chu Mizoram Badminton Association hruaitute nen inkawmna hun a hmanpui. Sports Minister Pu Lalnghinglova Hmar chuan GBA dintu leh Tata Trusts hotute Mizoram a an lo kal chu a lawm thu sawiin, “Training mumal tak leh kaihhruaina tha an dawn chuan Mizo player-ten badminton-ah talent an nei tih tunhnaia result atangin a lang chiang.” a ti a. “Kum 10 chuang nghah ngai tura kan ngaih kha kum li vel lek chhungin hlawhtlinna duhawm tak tak kan nei a, Pullela Gopichand Badminton Academy leh Tata Trusts puihna in India aiawh hial kan nei thei tawh.” tiin a sawi.
Pu Lalnghinglova chuan Mizoram hmasawnna turte sawi bawkin, “Kum 2036 Olympics-ah Mizo infiammi a tam thei ang ber India aiawhin tel se kan duh a, chumi tur chuan tuna PGBA leh Tata Trusts nena kan thawhhona hi lian zawka kalpui kan duh.” a ti a. “Mizo player thate PGBA emaw academy tha dangah an awm vek thei dawn lova, hei vang hian Mizoramah academy tha neih kan tum mek. Tin, hei bakah hian sports science leh sports injury inenkawlna kawngah hmabak kan la ngah hle.” tiin a sawi belh bawk. Badminton Association of India a Vice President ni lai Pu Gopichand chuan player tha tak pakhat chherchhuak turin mi engemaw zat tanrual a ngaih thu sawiin Mizoram Badminton Association ten theihtawp chhuaha an lo thawhpui avangin lawmawm a tih thu a sawi ve bawk a. “Mizoram chu a boruak a tha a, ram leilungin a zir avangin kum 10-15 a ral leh chuan India rama player thaten training-na tur boruak tha an mamawh dawn a, chumi tur chuan training centre tha lo neih a ngai.” a ti.
“Result-ah nasa takin hma kan sawn a, chutihrualin talent leh result mila hmunhma tha neih a pawimawh. Player tha chherchhuak turin state pawn academy a innghat zel lovin Mizoram-ah hian badminton hmunpui – academy leh performance centre neih a tul.” tiin a hmuna awm chilh a badminton zirna hmunhma changtlung tak neih a pawimawh thu a sawi. Pu Pullela Gopichand leh Pi Neelam Babardesai te hi June 14, 2025 a 1st Mizoram Grassroots Badminton League kharna programme ah an tel dawn a ni. Vawiina Sport Minister office a meeting-ah hian Mizoram Badminton Association hruaitute an tel bawk a ni.
