SPORTS MINISTER-I’N A BIAL CHHUNG SCHOOL TE HNENAH BUNGRUA A SEM
Vawiin khan Pu Lalnghinglova Hmar, Minister of State, Sports & Youth Affairs Department, etc. chuan a bial chhunga school thenkhat hnenah an hman tur computer set leh colour printer a sem a, academic session tharah Aizawl West-II bial chhunga sawrkar primary school-a zirlaite uniform pheikhawk leina a tumsak vek dawn tih a puang.Aizawl West-II bialtu MLA Pu Lalnghinglova Hmar hian kumin May thla khan a bial chhunga sawrkar school te a tlawhchhuak a, school hrang hrangin mamawh an lo thlente bawhzuiin, vawiin khan computer leh printer mamawh thu thlentu school te hnenah a hlan a ni.
Aizawl West-II bialtu MLA chuan zirna a ngai pawimawh tih sawiin, kumin chhungin a bial chhunga sawrkar school te tlawhchhuak leh vek a tum thu a sawi a. Session tharah a bial chhunga sawrkar primary school zirlaite uniform pheikhawk a tumsak tur thu a puang bawk.School tihhmasawnna tura hmachhawp thenkhatte tarlangin, a department chan Labour, Employment, Skill Development & Entrepreneurship (LESDE) kaltlangin Govt. KM HSS ah Skills Lab din a nih tur thu leh, Samagra Shiksha atangin karleh lamah greenboard sem a nih tur thu a sawi a ni.
Sports Minister-I’n vawiina bungrua a pekte chu – Govt. Middle School, Dawrpui Vengthar hnenah Computer set leh colour printer; Govt. Middle School, Vaivakawn hnenah Computer set leh, Govt. Middle School, Kanan hnenah Computer set leh colour printer te a ni. Hemi hma hian Govt. KM HSS, Dawrpui Vengthar hnenah volleyball leh volleyball net pe tawhin, water cooler pawh pek thuai tum a ni bawk.A bial chhunga sawrkar school te’n study tour/excursion an neih apiangin zirtirtute’n pawisa an thawhkhawm a nih chuan, an thawhkhawm belhkhawm ang zat zel a tum zel dawn bawk a ni.
