SOCIAL WELFARE MINISTER-IN TANHRIL-A TRAINING CENTRE FOR SPECIALLY-ABLED PERSONS LEH MITDEL HAWRAWP PRINTNA KHAWL ‘STATE BRAILLE PRESS’ TLAWH
Vawiin khan Social Welfare, Women and Child Development Minister Pi Lalrinpuii chuan pianphunga rualbanlo (Specially-Abled Persons) te tana buatsaih “Training Centre for Specially-Abled Persons, Tanhril” leh he Centre hnuaia State Braille Press te a tlawh a. Minister hi Pi Lalzarmawii, Commissioner & Secretary; Dr. Lalhriatzuali Ralte, Director, Social Welfare Department bakah hotu dangten an tawiawm a, hmasawnna hnathawh kal mekte thlirho niin hmalak zel dan turte sawiho a ni. Minsiter chuan rualbanlo zirlaite hnenah fuihna thu sawiin, rinawmna leh dikna nena nung turin a chah a, thawhrimna nen, Pathian hre reng turin a chah a ni.
Specially-Abled Training Centre, Tanhrilah hian Mitdel hawrawp print theihna khawl, State Braille Press bun a ni tawh a, mitdelte hman tur zirlaibu, ballot paper leh thil dangte print thin niin tunah hian Class 9-12 zirlaibute print mek a ni a, ram dang pan buai ngai tawh lovin mimal leh sawrkar tan dawr theih reng an ni. Training Centre for Specially-Abled Persons hi, kum 1981 khan ‘Handicapped Training Centre’ tiin Laipuitlang-ah din a ni a, kum 2017 khan Training Centre for Specially-Abled Persons tia hming thlak niin kumin April thla khan Tanhril-ah sawn thlak a ni a. Puan thui zirna seat 30 awmin, thla 8 chhung training neihpui thin an ni.
Training Centre hi a hmuna riahchilh theih (residential) niin riahchilh lova kalte chu, an training chhungin thlatin stipend Rs 700 pek thin an ni a, training an zawh hnuin puan thuina khawl leh khawl dang an mamawhte pek thin an ni bawk. Tun dinhmunah Mizoramah Specially-Abled-te tan hian Training Centre hmun 4 – Tanhril, Thakthing Dam Veng, Chaltlang leh Lunglei-ah te din a ni tawh bawk a, heng centre-ah te hian Trade hrang hrang zir theih niin training Centre atangte hian mi 1992 vel zir chhuak an awm tawh a ni. Social Welfare Department hmasawn nan leh hnathawktu indaih lohna phuhru tur hian District Social Welfare Officer (DSWO) pahnih leh Field Facilitator (FF) post 3 lak tharna tur buaipui mek a ni bawk.
