Siaha-ah Security Action Plan chungchang sawihona neih a ni
Siaha District Disaster Management Authority (DDMA) te chuan vawiin chawhnu dar 1 khan DC Mini Conference Room-ah an Chairman leh District Bawrhsap ni bawk Pu VL Hruaizela Khiangte kaihhruainain an thukhawm a, rikrum thil thlen thulha chet lak dan tur, security action plan chungchang an sawiho.
Vawiin thutkhawm chuan India leh Pakistan inkar boruak chhe mek avangin inring renga awm tul an ti a, Rikrum thil thlen thulha tih tur leh tih loh tur te a zau thei ang berin mipui hnena puan darh nise tih a ni. National Disaster Management Authority (NDMA) in Civil Defence chungchanga mipui hriattur a tihchhuah thupui hrang hrang sawiho a ni a, State level, District Level leh Community Level a SOP an tihchhuah te, Rikrum thil a thlena chet lak dan tur leh lo inrinlawk nan inkaihhruaina video siam sa te chu theh darh nise an ti bawk.
District chhunga Sawrkar Building pawimawhte leh Humhim ngai zualte (vulnerable areas) chhinchhiaha venhim a tul thu te, mipui kaihruai tura Civil Defence Warden ruat chungchangte, District Chhunga control room ruahmante, Khawtlang aurinna (public loudspeakers) hman tangkaite leh chhungkua in an mahni chhungkhur theuha an mawhphurhna chungchangte sawiho a ni. Heng Action plan hrang hrang an sawihote hi mipui hnenah a zau thei ang bera puandarh ni se tih a ni bawk.
