Serchhipa World AIDS Day (WAD) 2025 hman dan tur rel
Vawiin khan Serchhip DC Pu Paul L Khuma hoin Serchhip DC Meeting Hall-ah December ni 1 a World AIDS Day (WAD) 2025 hman dan tur thuneituten an rel. Serchhip DC chuan World AIDS Day chu HIV/AIDS chungchang mipui mimira inzirtirna hun a ni a, Mizoram leh Serchhip District atanga HIV/AIDS umbo a nih theihna tura hmanraw pawimawh tak a ni, a ti a. Theihtawp chhuaha an mawhphurhna hlen theuh turin kalkhawm te a sawm a ni.
World AIDS Day (WAD) 2025 hi Serchhip Bazar Traffic Point bulah chawhnu dar 2 ah hman ni se tiin an rel a. He hunah hian Serchhip DC Pu Paul L Khuma chu khuallian a ni anga. District AIDS Prevention Committee (DAPCC) aiawhin Dr Lallawmkimi, District AIDS Control Officer chuan thu a sawi ang.
A hmun hma buatsaih chungchang rel a ni a. Stage Decoration mumal taka tih tum niin zaithiam lar zai tura sawm a ni dawn bawk a. Hemi ni hian a duh apiang tan Voluntary Blood Testing tih ni se, tiin an rel a ni.
