School Education Minister Dr. Vanlalthlana’n NE Khawdungseiah Govt. Primary School-II a hawng
Vawiin khan School Education Minister Dr. Vanlalthlana chuan NE Khawdungseiah Govt. Primary School-II a hawng a, LTM High School, Ngopa a tlawh bawk a ni. Minister hi Directorate of School Education atangin Pi R. Lalnunthari, Joint Director (Elementary Education), Pu PC Lalngaizuala, Deputy Director (Secondary Education) leh Pu Micky Lalenkawla, DEO & DPC, Saitual ten an tawiawm a ni. NE Khawdungseia Govt Primary School-II hawnna inkhawmah hian School Education Minister Dr. Vanlalthlana chuan khawtlang mipuite, zirlai leh zirtirtuten tha taka an lo dawnsawnnaah lawmthu a sawi a, Education lama hotute hmalakna zarah zirna in tha tak an hawng thei chu lawmawm a tih thu a sawi bawk. Minister chuan sikul hrang hranga zirtirtu indaih lohna tikiam turin zirtirtu sem rual kawngah theih tawp an chhuah zel a ni, a ti a, zirtirtu sawn chhuah chungchangah buaina a tam thin avangin Transfer & Posting rules thar duan a nih tur thu a sawi bawk.
Dr. Vanlalthlana chuan National-level Entrance Exam hrang hrang NEET leh JEE-ah te Mizoram chuan state dang kan tluk lo thin hle tih a sawi a, zirlai naupangten hriatthiamna nen lehkha an zir theih nan sawrkar sikul zawng zawng te chuan term exam-ah te zawhna inang (common question) an chhang tawh dawn a ni, a ti. Danglamna siam tur chuan syllabus leh zawhna kalphung siam that a, zirtirtute chu training a tam thei ang ber pek a tul a ni tih a sawi bawk. Minister chuan sawrkarin mipuite rawn chung zelin hma lak a tum a ni, a ti a, zirna in ṭan hun chungchangah pawh nu leh paten school education website-ah te an duh dan an thehlut thei dawn a ni tih a sawi. Minister chuan NE Khawdungsei mipuite chu zirna in thar tha tak an neihnaah a lawmpui thu a sawi a, an kal lehzelna turah duhsakna a hlan nghal bawk a ni. Vawiin inkhawm hi Pu Lalhmingmawia VCP, NE Khawdungsei chuan a kai hruai a, Minister hian Govt Primary School-II hman tur computer a hlan nghal bawk a ni.
Vawiin khan School Minister chuan DPO Office, Samagra Shiksha, Saitual District chu a tlawh hmasa ber a, Pu Micky R. Lalenkawla, DEO leh Saitual District-a Village Council hruaitute nen inkawmhona hun an hmang a ni. Minister hi Hliappuiah khawtlang hruaitute nen inkawmhona hun an hman zawhah Govt. Primary School-II, NE Khawdungseiah a hawng a. Hemi zawh hian NE Khawdungsei Higher (Lumpsum) leh LTM High School, Ngopa chu a tlawh leh a ni.
