School education minister dr. Vanlalthlana’n st. Paul’s higher secondary school zirlai hlawhtlingte chawimawina hun a hmanpui
Vawiin chawhma khan St. Paul’s Higher Secondary School, Aizawl chuan High School Leaving Certificate leh Higher Secondary School Leaving Certificate Examination, 2025-a zirlai tithate chawimawina hun, Paulians’ Proficiency Award 2025, chu an School Auditorium-ah an hmang a. He hunah hian Dr. Vanlalthlana, Minister, School Education Department chu khuallian niin, Pi Angela Zothanpuii, Director, School Education Department, chu khual zahawm a ni. School Education Minister Dr. Vanlalthlana chuan St. Paul’s sikul atanga HSLC leh HSSLC 2025 exam-a hlawhtlingte chu a lawmpui thu sawiin, amah ngei pawh he sikul chhuak a nih thu a sawi a. Thiamna hmantlak, eizawnna ngelnghet nei tur a inzirna hmun pawimawh tak a nih thu sawiin, he sikula a thil zir leh thiamte chu amah ngei pawhin vawiin thlengin tangkai taka a chhawr thin thu a sawi.
Minister chuan zirlai hlawhtlingte chu St. Paul’s Higher Secondary School hlawhtlinna leh hmingthat tawhna vawngtu leh chawinungtu nih tum zel turin a fuih a, hlawhtlinna tluantling chang tur chuan mahni inthununtheihna, rinawmna leh taimaknate nunpui tlat a pawimawh thu a sawi bawk a ni. Khuallian chuan zirlai nih chhung chuan thiamna rintlak leh tangkai, ram leh hnam tan a chhenfakawm thiamna neih tuma bei turin kalkhawmte a chah a, sikul hung chhung an pelh huna harsatna leh buaina hmachhawn thiam turin leh inelna sang zawk an hmachhawn hunah pawh hlawhtlinna an chan theihna tura inbuatsaih chhunzawm zel turin a chah bawk a ni. School Education Minister chuan hlawhtlinna chang tura tumruhna leh teirei peih a pawimawh zia tarlangin, thil siamchhuaktu lar, James Dyson-a pawh kum nga chhunga vawi 5127 a hlawhchham hnua hlawhtlinna chang a nih thu a sawi a. A tumruhna avanga hian khawvela chawimawina ngaihhlut tak, Knighthood hial a dawn phah thu a sawi.
Dr. Vanlalthlana chuan zirlaibu pawn lama thiam thil zir tel thin a pawimawhzia sawiin, mi zinga khawsak thiam te, harsatna kara ruahmanna siam thiam te leh a hun leh hmun azira inherrem thiam te a pawimawh thu a sawi a. Tunlai mila thiamna hrang hrang chhuakte pawh belchianga, hmang tangkai hmasatu nih tum zel turin a chah bawk a ni. Zirlai hlawhtlingte lawmpuina hunah hian Bro. Kuriyan M.S., Principal, St. Paul’s Higher Secondary School, Montfort Hills, Tlangnuam, Aizawl chuan kalkhawmte lawmna thu sawiin, zirlai hlawhtlinna changte taimakna leh inpekna chu zirlai dangte tan pawh entawntlak a tih thu a sawi. Paulians’ Alumni Association (PAA) aiawhin an President, Dr. Franklin Lalrinngheta’n thu a sawi a. Cynthia Lalhlupuii Shangpliang, Class 12 Science Topper-in zirlai hlawhtlingte aiawhin thu a sawi bawk a ni.
