School education minister dr. Vanlalthlana’n kolasib-ah diet hostel thar a hawng; govt diakkawn high school ah meet your minister hun a hmanpui
Vawiin khan School Education, Higher & Technical Education leh ICT Minister, Dr. Vanlalthlana chuan Kolasib-ah District Institute of Education and Training (DIET) Hostel thar a hawng a. Hemi hnu hian ‘Meet Your Minister’ programme hmangin Govt. Diakkawn High School-ah zirlai naupangte nen inkawmhona an nei. DIET Hostel hawnna hun, Pi Laldinmawii, Principal, DIET-in a kaihhruaiah hian Minister Dr. Vanlalthlana chuan thu sawiin, DIET zirlaite chu nakin lawka zirtirtu la ni tur an nih avangin zirtirtu hna zahawm tak thawk tura an inbuatsaih laiin rilru paukhauh leh inpekna tak tak an neih a pawimawh a ni, a ti. Zirtirtu te chu naupangte hmangaihna dik tak nei a, an hlimnaa hlimpui thei leh an tahnaah pawh tahpui thei tur khawpa inpekna thuk an neih a ngai a ni, a ti.
Minister chuan zirtirtute chu hun vawn dik kawngah entawntlak ni tur te, an posting-na hmun apiangah lungawi taka thawk a, an hnathawhna hmun apiang tihhmasawn tuma tan la turin a chah bawk. He hunah hian Pu Vanlalchhana, DPC, Samagra Shiksha hnen atangin Technical Report ngaihthlak a ni a. He Hostel hi PAB Approval 2019-20 atanga hmuh niin, a sak nan hian Cheng Rs.221,46,637.50 hman a ni a, Type of Building chu RCC Framed Building niin, 30th May 2025-a sak zawh fel a nih thu a tarlang. DIET Hostel hawnna neih zawh hian Minister chuan Govt. Diakkawn High School-ah ‘Meet Your Minister’ programme hmangin zirlaite a kawm a. He hunah hian Govt. Diakkawn High School bakah Govt. Kolasib High School atanga zirlai naupangte an tel a ni.
Education Minister, Dr. Vanlalthlana chuan zirlaite fuihna thu sawiin, mi hlawhtlingte hlawhtlinna chauh en lova, an tumruhna leh an kalkawnga kawng hrehawm an zawh dan atanga inzir turin a chah. Hlawhchhamna chu hlawhtlinna kawnga kal tlang ngei ngei tur a nihzia sawiin, “Thomas Alva Edison-a pawh a thil siam chhuah hmain vawi sangkhat lai a hlawhchham hmasa a ni. Nangni pawh in zinkawngah vawi tam tak in hlawhchham dawn a, chutiang hunahte chuan inzirna atana hmang chungin, Pathianin talent hran theuh a pe che u tih hria a, beidawng lova bei fan fan turin ka duh che u a ni,” a ti. He hunah hian Minister chuan zirlai naupangte hnen atangin zawhna hrang hrang a dawng a, inkawm hona hun tha tak an hmang a ni.
