School education minister, dr. Vanlalthlana chuan international literacy day, 2025 new delhi ah chhim
School Education Department Minister, Dr. Vanlalthlana chuan International Literacy Day, 2025, Janpath Road, New Delhi a neih chu chhimin thu sawina hun a hmang a. Mizoramin 100% literacy rate kan neih chhan chu kan tanrualna zar a nih thu a sawi.
Minister chuan Mizoramin ziak leh chhiar lama bul kan tan dan te sawiin hawrawp kan neih theih nachhan leh ziak leh chhiar kan thiam chhan chu British lal hun laia Christian Missionary-te vang a nih thu a sawi a. Ziak leh chhiar chu inzirtir chhawng zelin India ramin British laka Independence kan neih hnu khan ziak leh chhiar thiam kan pun theih na pawimawh tak pakhat, Adult Education Wing a rawn din thu a sawi a. He Wing hian New India Literacy Programme (NILP) tan hma nasa tak lain kum 2022-23 khan 96.41% lai mai literacy rate kan neih theih tak thu a sawi a ni.
Heng hmalakna hrang hrangte zarah hian MoSPI hnuaia Periodic Labour Survey Force Annual Report chuan July 2023- June 2024 chhung khan Mizoram-a awm kum 7 chin chunglam ziak leh chhiar thiam zawng zawng chu 98.2% an nih thu a rawn puang ta a. Hei vang hian ULLAS chuan May 20, 2025 khan Mizoram chu India rama a hmasa ber atan fully literate state-ah an rawn puan tak thu a sawi a ni.
Minister chuan he hun kan thlen theih chhan chu State leh Central Sawrkar kan thawhhona that vang te, Kohhran, NGO, Civil Society leh Education Department te tanrualna rah a nih thu te sawiin hei maiah duhtawk lovin zirna, a bikin skill development lamah hma sawn zel tura tan kan lak a tul thu a sawi a. India ram chu ziak leh chhiar thiam vekna ramah siam turin Mizoram chuan Sawrkar laipui chu puih a inpeih reng thu a sawi a ni.
