School education department-in vantlang inrawnkhawmna hun buatsaih
School Education Department chuan vawiin khan Directorate of School Education Conference Hall-ah common school uniform, school calendar, leh school timing chungchang sawihona leh vantlang inrawnkhawmna hun, ‘Public Consultation Meeting’ a buatsaih. School Education Director Pi Angela Zothanpuii chuan Public Consultation Meeting hi uapin kalkhawmte hmaah thupui sawiho tur chanchin tlangpui leh inkohkhawm a nih chha te a sawi hawng hmasa a ni. School Education Director chuan he’ng thupui sawiho tur chungchangah hian an department hnenah ngaihdan ziaka thehlut tawh 200 chuang an awm thu a sawi a. Sawrkarin policy tha tak a duan dawn chuan a hmangtu turte ngaihdan hriat a pawimawh tih a sawi a ni.
Vantlang inrawnkhawmna hun hi Pu Lalhmachhuana, School Education Department Addl. Director-in a kaihruai a. Chawhma lamah thupui pahnih: Common School Uniform leh School Calendar chungchang sawiho a ni a, chawhnu lamah School Timing chungchang sawiho a ni.
He hunah hian Department hotute bakah, Rev. Dr. K. Thanzauva, School Education Department Consultant; State Council of Educational Research and Training (SCERT); Mizoram Board of School Education (MBSE); Samagra Shiksha; Information & Public Relations (I&PR) Department; Higher Secondary School Lecturers Association Mizoram (HISSLAM); Mizoram Education Inspecting Officers’ Association (MEIOA); Mizoram Independent Schools Association (MISA); Mizoram Secondary School Teachers’ Association (MISSTA); Mizoram Journalists Association (MJA); Mizoram Primary Teachers’ Association (MPTA); Middle School Teachers’ Association (MSTA); Mizoram Zirlai Pawl (MZP) aiawhte leh he’ng thupui chungchanga ngaihdan sawi duhte an tel a ni.
