Saitualah Mizoram Cleanliness Competition (MCC) 2025 District Level Kick-off programme hman a ni
Vawiin khan DC Conference Hall, Saitualah Mizoram Cleanliness Competition 2025, District Level Kick-Off programme hman a ni a, he hunah hian Saitual Town Sanitation Committee Chairman leh Bawrhsap ni bawk Dr. Lalngura Tlau chu khuallian niin hun a hmanpui. Saitual Town Sanitation Committee Chairman Dr. Lalngura Tlau chuan thu sawiin, Saitual leh Urban Town-a khawtlang hruaitute, NGO leh kohhran hrang hranga Thalai Pawl hruaitute pawh faina kawnga intihsiaknaa theih tawp chhuahpuiah a sawm a. Kalkhawmte chu intihsiakna tehfung (Parameters) te hre chiang a, mahni zawn theuha theih tawp chhuah turin a chah nghal a ni.
Bawrhsap chuan fai chu changkanna a nih mai bakah hriselna nghawng thil a ni a, hemi kawngah hian a huhova tan lak a tul a ni, a ti a, All India Level (Swatch Survekshan) ah lawmman la thei ngei turin tun atanga bul tan nghal turin kalkhawmte a sawm nghal bawk a ni. Vawiin Mizoram Cleanliness Competition (MCC), District Level Kick off programme hi Er. Laldinsanga Hnamte, DUDO, UD&PA in kaihruaiin report tlangpui a pe a, hmalakna tur hrang hrangte sawifiahna leh Mizoram Cleanliness Competition (MCC) 2025 atana inelna tur hrang hrang leh ruahmannate sawizauna a nei nghal bawk.
Vawiin inkhawmah hian Sawrkar Department hrang hrang hotute, Village Level Sanitation Committee, VC, NGO leh tlawmngai pawl hrang hrang aiawhte an tel a ni.
